İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 392 Hüküm no: 342 Orijinal metin no: [126-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Gazi Evranos Bey’in soyundan Yusuf Bey’e Evranos Bey Vakfı’ndan yıllık olarak tahsis edilen maaşına zam yapıldığı Tevliyet nizâ‘ına dâir Ma‘rûz Mübârek ve mes‘ûd rikâb-ı kamer-tâb-ı merâhim-nisâb-ı şâhâneye arzuhâl takdîm eden Yusuf Bey b. el-müteveffâ Topal Numan Beyzâde Mehmed Bey bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan Yenice-i Vardar ve Siroz ve Gümülcine ve gayride vâki‘ merhûm el-Hâc Gāzi Evrenos Bey’in [Bey] Vakfı’nın evlâdiyet ve meşrûtiyet üzere mütevellîlerinden ve Istabl-ı âmire müdîrliği pâyelülerinden derûn-ı arzuhâlde mezkûrü’l-ism Selanik muhassılı sâbık es-Seyyid Yusuf Sıddık Bey b. Abdurrahman Bey tarafından husûs-ı âti’l-beyânda vekâleti Mehmed Salih Ağa b. Mustafa ve es-Seyyid el-Hâc İbrahim Ağa b. İbrahim nâm kimesneler şehâdetleriyle sâbit olan çukadârı es-Seyyid Ahmed Nazif Efendi b. Hasan muvâcehesinde te‘âmül-i kadîm üzere vakf-ı mezkûrun gallesinden evlâd-ı evlâd-ı vâkıfdan olup fakīrü’l-hâl olanlara kadr-ı kifâye ta‘yîn-i ma‘âş ile idâre olunagelip ben dahi evlâd-ı evlâd-ı vâkıfdan ve fakīrü’l-hâl olduğumdan mukaddemâ galle-i vakf-ı mezkûrdan bâ-sened-i mütevellî bana senevî ikişer yüz ellişer guruş ma‘âş ta‘yîn olunmuş ise de el-hâletü hâzihî meblağ-ı mezkûr bana kifâyet etmediğinden kadr-ı kifâye meblağ dahi zam olunmak murâdımdır deyü işbu arzuhâlimle istid‘â eylediğimde vekîl-i mezbûr Ahmed Nazif Efendi dahi mukaddemâ ta‘yîn olunan meblağ-ı merkūm ikişer yüz ellişer guruş üzerine işbu târih-i i‘lâmdan beher sene ikişer yüz ellişer guruş dahi galle-i vakf-ı merkūmdan zamla cem‘an beher sene beşer yüz guruş vermeye bi’l-vekâle müte‘ahhid ben dahi râzı olup bu vechile kat‘-ı nizâ‘ eyledik dediğini vekîl-i mezbûr es-Seyyid Ahmed Nazif Efendi tasdîk eylediği tescîl ve İstanbul Mahkemesi’nden huzûr-ı [âlîlerine i‘lâm olundu] Fî 20 Ca sene 1258