İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 394 Hüküm no: 344 Orijinal metin no: [126-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap gediği hisselerinin satışı Kasab [Ma‘rûz] Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab dükkânlarından mahrûse-i Galata’ya muzâfe kasaba-i Tophâne’de çörekçi fırını karşısında vâki‘ bir bâb ve Sebil kurbünde vâki‘ bir bâb ve Boğazkesen nâm mahâlde vâki‘ bir bâb ki cem‘an üç bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin her biri altışar sehm i‘tibârıyla birer sehm hisselerine ve yine ikinci selhhâneye merbût kasaba-i mezkûrede atik sebîl ve çeşmeye muttasıl bir bâb ve çörekçi fırını karşısında vâki‘ bir bâb ve Boğazkesen nâm mahâlde vâki‘ bir bâb ki cem‘an üç bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin sümün hisselerine ve beşinci selhhâneye merbût yine kasaba-i mezkûrede yağhâne önünde vâki‘ bir bâb ve mahkeme köşesinde vâki‘ bir bâb ki cem‘an iki bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin dahi nısf hisselerine iki kıt‘a temessük-i mütevellî ile bi’l-icâreteyn mutasarrıf olan Yani v. Nikola zimmî bundan akdem hâlik olup âlât-ı gedik-i merkūmlardan ber-vech-i muharrer mutasarrıf olduğu hısas-ı mezkûre sulbî kebîr oğlu kasab tâifesinden Nikola zimmî ile hâlâ vilâyet-i Rumeli’de medîne-i Ergiri civârında Pogonya Kazâsı’na tâbi‘ Delvinaki karyesinde mütemekkine kebîre kızı Nono Nasrâniyeye hasbe’l-âde münâsafeten intikāl eylediğini hâlâ Kassâbân müdîri es-Seyyid Mehmed Ali Bey ile mazbûtü’l-esâmî kasab ustaları ihbâr ettiklerinden sonra gāibe-i mersûme Nono Nasrâniye tarafından husûs-ı âti’l-beyânda bâ-hüccet vekîl olduğu şahsını bilirler karye-i mezkûre re‘âyâsından Dimitri v. Sava ve Hıristo v. Margarita nâm zimmîler şehâdetleriyle sâbit olan diğer Dimitri v. Nikola zimmî meclis-i şer‘-i hatîrde hâlik-i mersûmun oğlu bâ‘isü’l-i‘lâm mersûm Nikola zimmî muvâcehesinde bi’l-vekâle takrîr-i kelâm edip zikr olunan kasab dükkânları gedik âlâtlarından müvekkilem gāibe-i mersûme Nono Nasrâniyenin babası hâlik-i mersûmdan âdiyen intikāl eden nısf hısas-ı merkūmeyi beş bin guruş bedel-i makbûz mukābelesinde karındaşı mersûm Nikola zimmîye bâ-re’y-i mütevellî ferâğ-ı kat‘î-i mu‘teber ile bi’l-vekâle ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fîmâ-ba‘d nısf hısas-ı merkūmede müvekkilem mersûme Nono Nasrâniyenin aslâ ve kat‘a alâka ve medhali kalmayıp mecmû‘-ı hısas-ı merkūme ber-vech-i muharrer benim ferâğımdan ve babası mersûm intikālinden mersûm Nikola zimmînin dâhil-i havza-i tasarrufu olmuşdur deyü ba‘de’l-ikrâr ve’t-tasdîk âlât-ı gedik-i merkūmların hısas-ı mezkûreleri ber-minvâl-i muharrer vekîl-i mesfûr Dimitri zimmînin ferâğından ve babası hâlik-i mersûm Yani zimmînin intikālinden defter-i vakf-ı şerîfde mersûm Nikola zimmî uhdesine kayd ve der-dest olan temessük-i mezkûrlar hâmişlerine zabt ü tasarrufi’çün tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-gurreti C sene [1]258