İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 395 Hüküm no: 345 Orijinal metin no: [127-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap gediği hisselerinin satışı Kasab Ma‘rûz Kezâlik ri‘âyet şartıyla sekizinci selhhâneye merbût kasab dükkânlarından medîne-i Üsküdar’a muzâfe Beykoz karyesinde ekmekçi fırını ittisâlinde vâki‘ bir bâb ve Köprübaşı’nda vâki‘ bir bâb ve onuncu selhhâneye merbût İncir karyesinde vâki‘ bir bâb ve üçüncü selhhâneye merbût Yalı karyesinde vâki‘ bir bâb ki cem‘an dört bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin nısf hisselerine ve birinci selhhâneye merbût mahrûse-i Galata’ya muzâfe kasaba-i Tophânekapısı ve ittisâlinde selhhâne önünde vâki‘ bir bâb ve kasaba-i mezkûrede manavlar içinde vâki‘ bir bâb ki cem‘an iki bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerden her biri dahi yirmi dörder sehm i‘tibârıyla yedişer buçuk sehm hisselerine iki kıt‘a temessük-i mütevellî ile bi’l-icâreteyn mutasarrıfe olup hâlâ medîne-i Yanya civârında Pogonya Kazâsı’na tâbi‘ Delvinaki? karyesinde mütemekkine olan Marine bt. Yani Nasrâniye tarafından husûs-ı âti’l-beyânda bâ-hüccet vekîl olduğu şahsını bilirler karye-i mezkûre re‘âyâsından Dimitri v. Sava ve Hıristo v. Margarita nâm zimmîler şehâdetleriyle sâbit olan yani v. Nikola zimmî meclis-i şer‘-i hatîrde müvekkile-i gāibe-i mersûmenin li-ebeveyn er karındaşı kasab tâifesinden bâ‘isü’l-i‘lâm Yamandi zimmî muvâcehesinde hâlâ Kasablar müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde bi’l-vekâle takrîr-i kelâm edip zikr olunan kasab dükkânları gedik âlâtlarından müvekkilem gāibe-i mersûme Marine Nasrâniyenin ber-vech-i muharrer mutasarrıfe olduğu hısas-ı merkūmeyi yirmi dokuz bin guruş bedel-i makbûz mukābelesinde karındaşı mesfûr Yamandi zimmîye bâ-re’y-i mütevellî ferâğ-ı kat‘î-i mu‘teber ile bi’l-vekâle ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d hısas-ı merkūme mersûm Yamandi zimmînin hakk-ı müfevvezi olup müvekkilem mersûme Marine Nasrâniyenin aslâ ve kat‘a alâka ve medhali kalmamışdır deyü ba‘de’l-ikrâr ve’t-tasdîk âlât-ı gedik-i merkūmların hısas-ı mezkûreleri fâriğ-i vekîl-i mesfûr Yani zimmînin ferâğından defter-i vakf-ı şerîfde mersûm Yamandi zimmî uhdesine kayd ve der-dest olan temessük-i mezkûrlar hâmişlerine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-gurreti Ca sene [1]258