İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 396 Hüküm no: 346 Orijinal metin no: [127-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin borcunu ödemesi 1299 [guru]ş hüküm [Ma‘rûz] Celeb tâifesinden olup arzuhâl eden Nano v. Aslanço zimmî İstanbul Mahkemesi’nde meclis-i şer‘-i münîrde derûn-ı arzuhâlde ismi mezkûr Esirci Mısrî es-Seyyid el-Hâc Ali b. İbrahim muvâcehesinde mezbûr es-Seyyid el-Hâc Ali zimmetinde sene-i sâbıkā Zilhiccetü’ş-şerîfesinin on dokuzuncu günü mâlımdan ve yedimden bi-safkatin vâhidetin iştirâ ve kabz eylediği elli re’s kurbanlık ganem semeninden bâ-tahvîl bin beş yüz guruşdan bâkī bin iki yüz doksan dokuz guruş alacak hakkım olup hattâ meblağ-ı bâkī-i merkūm bin iki yüz doksan dokuz guruş cihet-i mezkûreden zimmetinde bana deyni olduğunu işbu târih-i i‘lâm günü mahkeme-i mezkûrede kethudâ efendilere mahsûs odada ikrâr dahi etmekle meblağ-ı bâkī-i mezkûr bin iki yüz doksan dokuz guruşu mezbûr es-Seyyid el-Hâc Ali’den hâlâ taleb ederim deyü da‘vâ ettikde ol dahi cevâbında ben sâlifü’l-beyân [sene-i sâbıkā] Zilhiccetü’ş-şerîfesinin on beşinci günü târihinde ismi ma‘lûmum olmayan bir Arnavud’dan bin beş yüz guruşa ol-mikdâr re’s ganem iştirâ ve kabz ve ba‘dehû vilâyetine gidecek oldukda meblağ-ı merkūm bin beş yüz guruşu benden kabza müdde‘î-i mersûm Nano zimmî tarafından tevkîl edip gitdikde tahvîl-i mezkûru müdde‘î-i mersûma verdiğimden mâ‘adâ meblağ-ı merkūmun bir def‘a iki yüz bir guruş ve bir def‘a dahi beş yüz guruş ve bir def‘a dahi kezâlik beş yüz guruşunu müdde‘î-i mersûma edâ ve teslîm etmemle mâ‘adâ iki yüz doksan dokuz guruş zimmetimde bâkī kalmışdır deyip müdde‘î-i mersûmun ber-minvâl-i muharrer müdde‘âsını mezbûr es-Seyyid el-Hâc Ali ve müdde‘î-i mersûm dahi mezbûr es-Seyyid el-Hâc Ali’nin ziyâde teslîm müdde‘âsını dahi her biri inkârlarından mâ‘adâ müdde‘î-i mersûm mezbûr es-Seyyid el-Hâc Ali’nin ikrâr-ı meşrûhunu her biri lede’t-tezkiye adl ve makbûlü’ş-şehâde idikleri ihbâr olunan hâlâ Kasablar müdîri es-Seyyid Ali Bey b. es-Seyyid Osman ve Yazıcısı es-Seyyid el-Hâc Mehmed Haşim Efendi b. es-Seyyid el-Hâc Mehmed Emin şehâdetleriyle ber-nehc-i şer‘î isbât etmeğin mûcebince meblağ bâkī-i merkūm bin iki yüz doksan dokuz guruşu müdde‘î-i mesfûr Nano zimmîye edâ ve teslîme mezbûr es-Seyyid el-Hâc Ali’ye tenbîh olunduğu huzûr-ı [âlîlerine i‘lâm olundu] Fî-gurreti Ca sene [1]258