İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 397 Hüküm no: 347 Orijinal metin no: [127-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çömlekçi Petro’nun Mehmed Ağa’ya olan borcunu ödemesi 12000 [guru]şa sulh 6000 [guru]şa hüküm [Ma‘rûz] Enderûn-ı hümâyûndan muhrec sâhib-i arzuhâl es-Seyyid Mehmed Ağa b. es-Seyyid Ebûbekir bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde medîne-i Üsküdar’da vâki‘ Çömlekçi esnâfından derûn-ı arzuhâlde mastûrü’l-ism Petro v. Kiso zimmî muvâcehesinde ben mersûm Petro zimmî ile bir müddet Çömlekçilik ticâretinde inânen şerîkler olup ba‘dehû bin iki yüz elli altı senesi Zilhiccetü’ş-şerîfesinin beşinci günü fesh-i akd-i şirket birle hesâbını sehv ü galatdan ârî yegân yegân hesâb-ı sahîh ve esnâf ma‘rifetleriyle rü’yet eylediğimizde lede’l-muhâsebe benim re’s-i mâlım olup mersûm Petro zimmî zimmetinde kabzımâl olduğundan on dokuz bin iki yüz altmış guruş alacağım zuhûr ettikde mersûm Petro zimmî meblağ-ı merkūm on dokuz bin iki yüz altmış üç guruş cihet-i mezkûreden zimmetinde bana deyni olduğunu ikrâr-ı kat‘î ile ikrâr ve bir kıt‘a deyn temessüğü dahi verip hattâ işbu yedimde olan sene-i sâbıkā yani bin iki yüz elli yedi senesi Şa‘bâni’l-mu‘azzamı’nın yirmi üçüncü günü târihiyle müverrah ve Sadr-ı Anadolu bulunan sa‘âdetlü fazîletlü Abdülhalim Efendi hazretlerinin hâtemlerini hâvî huzûrlarında mürâfa‘adan verdikleri bir kıt‘a i‘lâm nâtık olduğu üzere mersûm Petro zimmî üzerine ikrârıyla hükmolunmuş iken ancak zahr-ı i‘lâm nâtık olduğu üzere üç bin üç yüz guruşunu bana edâ edip bâkīsi olan on beş bin dokuz [yüz] altmış üç guruşu hâlâ edâ etmemekle meblağ-ı bâkī-i mahkûmün-bih-i merkūm on beş bin dokuz yüz altmış üç guruşu mersûm Petro zimmîden hâlâ taleb ederim deyü mazmûnu takrîrine mutâbık bir kıt‘a i‘lâm-ı şer‘î ibrâzıyla da‘vâ ettikde ol dahi cevâbında kaziyye ber-minvâl-i meşrûh <> üzere olduğunu bi-tamamihâ tâyi‘an ve kat‘iyyen ikrâr ü i‘tirâf edip lâkin bâ-temessük-i mütevellî bi’l-icâreteyn mutasarrıf olduğum medîne-i mezkûrede Kavak nâm mahâlde vâki‘ bir bâb Çömlekçi dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeyi müdde‘î-i mezbûr es-Seyyid Mehmed Ağa’ya cihet-i karzdan altı bin guruş deynim mukābelesinde bin iki yüz elli dört senesi Recebi’l-müreccebinin on beşinci günü vefâen bâ-re’y-i mütevellî ferâğ ve tefvîz etmemle meblağ-ı merkūm altı bin guruş hesâb-ı mezkûra idhâl ve ancak re’s-i mâlı olup zimmetimde alacağı zuhûr eden üç bin iki yüz altmış üç guruşa zamla meblağ-ı mezkûr on dokuz bin iki yüz altmış üç guruşa iblâğ olunmağla bu sûretde meblağ-ı bâkī-i merkūm on beş bin dokuz yüz altmış üç guruşu müdde‘î-i mezbûra edâ eylediğimde gedik-i mezkûrdan keff-i yed etsin deyü inkâra mukārin ibrâ eylediği kelâmı meşrû‘ ve iltifâta şâyân olmadığı müdde‘î-i mersûm Petro zimmîye tefhîm ve ba‘dehû meblağ-ı merkūm altı bin guruş ber-vech-i muharrer hesâb-ı mezkûrda dâhil olmadığını ikrâr dahi etmekle mûcebiyle meblağ-ı bâkī-i merkūm on beş bin dokuz yüz altmış üç guruş mersûm Petro zimmîden tahsîl ve müdde‘î-i mezbûr es-Seyyid Mehmed [128] Ağa’ya teslîm ettirilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 27 Ca sene [1]258