Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 469 Hüküm no: 557 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Cafer Paşa’nın Emine Hanım bt. Mehmed aleyhindeki bahçe davasında haksız olduğu Asrında kapudân oldukdan sonra fevt olan merhûm Cafer Paşa’nın sulbiye kebîre kızı ve hasren vârisesi olduğu şer‘an sâbit ve mütehakkik olup mahrûse-i Üsküdar’da el-Hâc Cafer mahallesinde sâkine Fâtıma Hanım ba‘de’t-ta‘rîfi’ş-şer‘î saray-ı kāimmakām-ı hazret-i sadr-ı a‘zamîde ma‘kūd meclis-i şer‘-i şerîf-i âlîde mahrûse-i Galata müzâfâtından Kuruçeşme nâm karyede sâkin iken mukaddemâ vefât eden Mehmed Ağa’nın sulbiye kebîre kızı ve hasren vârisesi olup merhûm Cafer Ağa vakfından karye-i mezbûrede vâki‘ bir tarafı Nasuh Paşa bahçesi ve bir tarafı Ömer Ağa menzili ve bir tarafı sâhil-i bahr ve bir tarafı vâdi ile mahdûd dâhiliyye ve hâriciyyesi büyût-ı adîde ve hamam ve kusûrunu ve bir mâ-i cârîyi müştemil hadîkaya meşrûtiyyet üzre mutasarrıf olan işbu hâmiletü’l-kitâb Emine Hâtun mahzarında üzerine da‘vâ ve takrîr-i kelâm edip mârrü’l-beyân hadîkanın vakfiye-i ma‘mûlün-bihâsında ancak tasarrufu kendiye meşrût olup tevliyyeti âhara meşrûta iken mezbûre Emine Hâtun’un babası müteveffâ-yı mezbûr Mehmed Ağa’nın kırk bir senesinde hadîka-i mezbûreyi fuzûlen müteveffâ-yı mezbûr Cafer Paşa’ya hayâtında dokuz yük akçeye icâre-i mu‘accelesinden on bin akçe müeccele ile bilâ-ta‘yîn-i müddet îcâr ve teslîme ol dahi istîcâr ve tesellüm ve meblağ-ı mezbûr dokuz yük akçeyi merkūm Mehmed Ağa’ya def‘ ve teslîme ol dahi ahz u kabz ve mesârif-i lâzımesine sarfla istihlâk ettiğinden sonra merkūm Cafer Paşa hadîka-i mezkûreyi üç sene zabt edip ba‘dehû fevt oldukda mücerred yedinde bulunmağla hadîka-i mezkûre mülkü olmak üzre taraf-ı şehriyârîden kabz ve merhûme ve mağfûrun-lehâ Ayşe Sultan hazretlerine verilip ol dahi otuz sene tasarruf edip fevt oldukda hadîka-i mezbûre mûceb-i şart-ı vâkıf mezbûre Emine Hâtun’a hükm ve teslîm olunup el-yevm tasarrufunda olmağla babası müteveffâ-yı mezbûr Mehmed Ağa hadîka-i mezkûreyi ber vech-i muharrer îcârı sahîha olmamağla mezbûr Mehmed Ağa’nın târih-i mezkûrda mu‘accele olmak üzre bi gayri hakkın kabz ve istihlâk eylediği meblağ-ı mezbûr dokuz yük akçemi makbûzu olan tereke-i müteveffâ-yı mezbûrdan mezkûre Emine Hâtun’dan taleb eylediğimde bana edâ ve teslîmden imtinâ‘ eder suâl olunup teslîme tenbîh olunması matlûbumdur dedikde gıbbe’s-suâl mezbûre Emine Hâtun cevâbında babası müteveffâ-yı mezbûrun terekesini kabz ve mezbûr Mehmed Ağa Hadîka-i mezkûreyi vech-i meşrûh üzre îcâr ve teslîm ve mu‘accele-i merkūme dokuz yüz akçeyi kabz ve istihlâkini bi’l-külliye inkâr ettiğinden sonra mâ‘adâ mezbûre Fâtıma Hanım bin yetmiş yedi senesi Cemâziyelevvel’inde İstanbul kadısı olan Pîrîzâde demekle şehîr a‘lemü’l-ulemâ’i’l-fihâm Mustafa Efendi b. Mehmed huzûrunda husûs-ı mezbûru benden da‘vâ edip müdde‘âsını isbât edemeyip şer‘an bana yemîn vermekle mezbûre bî-vech mu‘ârazadan men‘ ve yedimde hüccet-i şer‘iyye verilmişdi deyû mûmâ-ileyh imzâsıyla mümzât ve hatmiyle mahtûme ve hatt-ı hümâyûn-ı sa‘âdet-makrûn-ı sultânî ile mu‘anven hüccet-i şer‘iyye ibrâz edip muvâcehesinde feth ve kırâat olundukda mazmûnu min külli’l-vücûh takrîr-i meşrûhuna mutâbık bulunmağın gıbbe’l-istintâk mezkûre Fâtıma [93a] Hanım mazmûn-ı hüccet-i mezkûreyi bi tav‘ihâ ikrâr ve i‘tirâf etmeğin mûcebiyle mezbûre, bî-vech mu‘ârazadan men‘ olunup işbu vesîka bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Umdetü erbâbü’t-tahrîr ve’l-kalem tezkireci Mustafa Efendi, zahrü ashâbü’t-tastîr ve’r-rakam tezkireci Handan Efendi, umdetü’l-eşbâh ve’l-a‘yân çavuşbaşı Ali Ağa, zahrü’l-eşbâh muhzır İbrahim Ağa.