İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 400 Hüküm no: 349 Orijinal metin no: [129-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zübeyde Hatun’un borcunu ödemesi 4000 [guru]ş hüküm Ma‘rûz Yorgancı esnâfından sâhib-i arzuhâl es-Seyyid Mehmed Ağa b. Veliyüddin meclis-i şer‘-i münîrde li-ebeveyn kız karındaşı derûn-ı arzuhâlde mezkûretü’l-ism mu‘arrefetü’z-zât Şerife Zübeyde Hatun muvâcehesinde ben kız karındaşım mezbûre Zübeyde Hatun ile mâ‘an mahrûse-i Galata’ya muzâfe kasaba-i Tophâne’de Firuzağa mahallesinde vâki‘ bir bâb menzilde bir müddetden berü sâkinler iken bu esnâda müfârakat etmemle mâlım olup menzil-i mezkûrda kız karındaşım mezbûre yedinde kalmağla el-hâletü hâzihî bana teslîme müte‘ahhide olduğu mecmû‘u bin beş yüz guruş kıymetli bâ-defter-i müfredât eşyâ-i ma‘lûmemden mâ‘adâ zimmetinde cihet-i karzdan bâ-tahvîl dört bin guruş alacak hakkım olmağla meblağ-ı merkūm dört bin guruşu kız karındaşım mezbûre Şerife Zübeyde Hatun’dan hâlâ taleb ederim deyü da‘vâ ettikde ol dahi cevâbında karındaşı müdde‘î-i mezbûrun eşyâ-i mezkûresini kendine teslîme ta‘ahhüd eylediğini ve merkūm dört bin guruş dahi cihet-i mezkûreden karındaşı mezbûra el-yevm zimmetinde deyni olduğunu tâyi‘aten ve kat‘iyyen ikrâr ü i‘tirâf etmeğin mûcebince meblağ-ı mezkûr dört bin guruşun karındaşı müdde‘î-i mezbûr es-Seyyid Mehmed Ağa’ya edâsıyla mezbûre Şerife Zübeyde Hatun ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 C sene [1]258