İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 402 Hüküm no: 351 Orijinal metin no: [129-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Karabet’in alacak talebiyle Erzurumlu Nazret’e açtığı davada sulh oldukları 4000 [guru]ş tecîl Ma‘rûz Arzuhâl eden Haffâf Karabet v. Sahak zimmî bi’l-ma‘iyye rü’yete memûr Evkāf-ı Hümâyûn müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde bi’t-terâzî bâb-ı cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde derûn-ı arzuhâlde ismi mastûr Hamamcı E[r]zurumlu Nazret v. Mardıros zimmî muvâcehesinde mersûm Nazret zimmî bin iki yüz elli altı senesi Şevvâli’l-mükerreminin on yedinci günü İstanbul’da Bezzâzistân-ı atik kurbünde Yolgeçen Hanı demekle ma‘rûf bir bâb hanın tabaka-i ulyâsının nerdubânı üzerinde kal‘a ta‘bîr olunur mahâllin senevî merhûm Mi‘mâr Sinan Yusuf Ağa Vakfı’na yüz elli akçe mukāta‘ası ve üzerinde mebnî ebniyesi Halil Paşa halîlesi Hatice Hanım’ın medîne-i Üsküdar’a muzâfe İstavroz karyesinde vâki‘ mekteb ve hayrât-ı sâiresi vakfı müstegallâtından olmak üzere bir bâb sagīr odayı ve derûnunda mevcûd gedik ta‘bîr olunur yine vakf-ı mezkûrdan olmak üzere âlât-ı lâzıme-i ma‘lûmeyi dahi bi’l-icâreteyn tasarrufumdadır deyü altı bin guruş bedel-i makbûz mukābelesinde bana ferâğ ben dahi kabûl edip zabt etmek üzere iken zikr olunan oda ve gediğin mecmû‘u merhûm-ı merkūm Mi‘mâr Sinan Yusuf Ağa Vakfı’ndan olduğu mütehakkık olduğundan taraf-ı vakf-ı merkūmdan zabt olunmağla el-hâletü hâzihî ben dahi mersûm Nazret zimmîye medfû‘um olan bedel-i merkūm altı bin guruşun iki bin guruşunu [130] rızâmla hatt u tenzîl etmemle bâkīsi olan dört bin guruşu dahi mersûm Nazret zimmî çend rûz zarfında bana redd ü teslîme ta‘ahhüd edip meblağ-ı bâkī-i merkūm dört bin guruşdan mâ‘adâ ziyâdesine ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 3 C sene [12]58