İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 403 Hüküm no: 353 Orijinal metin no: [130-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin, babası Yani’den intikal eden kasap gediği hisselerini Kasap Zoli’ye sattığı Kasab [Ma‘rûz] Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla dokuzuncu selhhâneye merbût kasab dükkânlarından medîne-i Üsküdar’da Küçükhamam karşısında manav dükkânına muttasıl bir bâb ve yine hamam-ı mezkûr karşısında paçacı ve kebâbcı dükkânına muttasıl bir bâb ki cem‘an iki bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin rub‘ hisselerine ve zikr olunan manav dükkânına muttasıl kasab dükkânı gediğinin diğer bir rub‘ ve sâlifü’l-beyân paçacı ve kebâbcı dükkânına muttasıl kasab dükkânı gediğinin dahi nısf rub‘ ki cem‘an âhar bir buçuk rub‘ hisselerine iki kıt‘a temessük-i mütevellî ile bi’l-icâreteyn mutasarrıf olan Yani v. Saro zimmî bundan akdem hâlik olup âlât-ı gedik-i merkūmlardan ber-vech-i muharrer mutasarrıf olduğu hısas-ı mezkûra hâlâ vilâyet-i Rumeli’de Avlonya sancağında Pogonya Kazâsı’na tâbi‘ Delvinaki karyesinde mütemekkin cünûn-ı mutbık ile mecnûn olan sulbî kebîr oğlu Yorgi zimmîye hasbe’l-âde intikāl eylediğini hâlâ Kassâbân müdîri es-Seyyid Mehmed Ali Bey mazbûtü’l-esâmî kasab ustaları ihbâr ettiklerinden sonra mecnûn-ı mersûmun anası ve umûrunu rü’yete kıbel-i şer‘den mansûbe vasîsi olup yine karye-i mezkûrede mütemekkine Zibofno? bt. Lulu v. Atam Nasrâniye tarafından husûs-ı âti’l-beyânda bâ-hüccet vekîl olduğu şahsını bilirler karye-i mezkûre re‘âyâsından Yamandi v. Yani ve Dimitri v. Sava nâm zimmîler şehâdetleriyle sâbit olan diğer Yani v. Nikola zimmî meclis-i şer‘-i hatîrde kasab tâifesinden bâ‘isü’l-i‘lâm Zoli v. Dimo zimmî muvâcehesinde bi’l-vekâle takrîr-i kelâm edip zikr olunan kasab dükkânları gedik âlâtlarından müvekkilem gāibe-i mersûme Zibofno? Nasrâniyenin vasîsi olduğu oğlu mecnûn-ı mersûm Yorgi zimmîye babası hâlik-i mersûmdan âdiyen intikāl eden hısas-ı merkūmeyi müsevveg-i şer‘iye[ye] binâen bi’l-izni’ş-şer‘î ba‘de’l-müzâyede ve inkıtâ‘u’r-rağbe bedel-i misli idiği zâhir olup mecnûn-ı mersûma şer‘an makbûzum olan on bin guruş mukābelesinde mersûm Zoli zimmîye bâ-re’y-i mütevellî ferâğ-ı kat‘î-i mu‘teber ile bi’l-vekâle ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d hısas-ı merkūmede mecnûn-ı mersûm Yorgi zimmînin aslâ ve kat‘a alâka ve medhali kalmayıp mesfûr Zoli zimmînin hakk-ı müfevvezi olmuşdur deyü ba‘de’l-ikrâr ve’t-tasdîk âlât-ı gedik-i merkūmların [131] hısas-ı mezkûreleri hâlik-i mersûm Yani zimmîden oğlu mecnûn-ı mesfûr Yorgi zimmîye ba‘de’l-intikāl vekîl-i mersûm diğer Yani zimmînin ferâğından defter-i vakf-ı şerîfde mersûm Zoli zimmî uhdesine kayd ve der-dest olan temessük-i mezkûr hâmişlerine zabt ü tasarrufi’çün tahrîr ü temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 8 C sene 1258