İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 406 Hüküm no: 356 Orijinal metin no: [131-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı Kirkor’un ortaklığı feshettikleri Arakil’e açtığı alacak davasında sulh olup zimmet ibrası yaptıkları 3000 [guru]şa sulh [Ma‘rûz] Horasancı esnâfından olup arzuhâl eden Kirkor v. Kolo nâm zimmî meclis-i şer‘-i hatîrde sâbıkā şerîki derûn-ı arzuhâlde ismi mastûr Arakil v. Ciron nâm zimmî muvâcehesinde mersûm Arakil zimmînin li-ebeveyn er karındaşı Gabril zimmî hâzır olduğu hâlde ben mersûm Arakil zimmî ile bin iki yüz elli beş senesi Muharremi’l-harâm’ı gurresinden sene-i merkūme Şa‘bâni’l-mu‘azzamı yirmi ikinci gününe gelince kireçcilik ticâretinde inânen şerîkler olup ba‘dehû târih-i merkūmda fesh-i akd-i şirket birle hesâbımızı sehv ü galatdan ârî yegân yegân sahîhan < rü’yet eylediğimizde lede’l-muhâsebe benim gerek re’s-i mâl ve gerek fâide-i hâsıla hissem olup mersûm Arakil zimmî zimmetinde kabzımâl olduğundan on iki bin guruş alacak hakkım zuhûr etmekle meblağ-ı mezkûr on iki bin guruşu mezbûr mesfûr Arakil zimmîden hâlâ taleb ederim deyü tasaddî eylediğim [da‘vâmdan] bâ-tavassut-ı muslihîn mersûm ile kat‘an-li’n-nizâ‘ üç bin guruş bedel-i medfû‘ ve makbûza ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde ve bi’l-cümle husûs-ı mezkûra ve zımnında cereyân eden ahz ü i‘tâya ve sâir cemî‘ hukūk-ı şer‘iyeye müte‘allika âmme-i de‘âvîden ben mersûm Arakil zimmî ile karındaşı hâzır-ı mesfûr Gabril zimmîden zimmetini ibrâ-i âmm-ı sahîh-i şer‘î ile ibrâ ve iskāt eylediğimde onlar dahi bi’l-cümle zikr olunan husûslara ve sâire müte‘allika âmme-i de‘âvîden kezâlik benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl edip külliyen kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 10 C sene [1]258