İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 407 Hüküm no: 357 Orijinal metin no: [131-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz Ahmed Nazif Ağa’nın vakıf mahzen gediğini Hatice Hanım’a sattığı [Ma‘rûz] Derûn-ı arzuhâlde mezkûrü’l-ism Canbaz el-Hâc Ahmed Nazif Ağa b. Halil bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde sâhibe-i arzuhâl mu‘arrefetü’z-zât Hatice Kadın bt. Abdullah muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan Veziriâ‘zam-ı esbak merhûm es-Seyyid Hasan Paşa’nın İstanbul’da Vezneciler sûkunda vâki‘ medrese-i şerîfe ve hayrât-ı sâiresi vakfının bi’l-meşrûta hâlâ mütevelliyesi Şerife Cemile Hanım tarafından husûs-ı âtîde vekîl-i şer‘îsi Mehmed Rifat Efendi b. Ahmed hâzır olduğu hâlde vakf-ı mezkûr müsakkafâtından medrese-i mezkûre tahtında arabacı dükkânı ittisâlinde kâin bir bâb kârgîr vakıf mahzen mezbûre Hatice Kadın’ın bâ-temessük-i mütevellî bi’l-icâreteyn müstakılleten taht-ı tasarrufunda ve derûnunda mevcûde gedik ta‘bîr olunur yine vakf-ı mezkûr müstegallâtından âlât-ı lâzıme-i ma‘lûme dahi benim kezâlik bi’l-icâreteyn taht-ı tasarrufumda olup el-hâletü hâzihî ben ber-vech-i muharrer mutasarrıf olduğum gedik-i merkūmu rızâmla iki bin iki yüz elli guruş bedel mukābelesinde mezbûre Hatice Kadın’a ferâğ-ı kat‘î-i mu‘teber ile ferâğ ve tefvîz eylediğimde ol dahi ber-vech-i muharrer tefevvüz ve kabûl ve bedel-i merkūm iki bin iki yüz elli guruşu bana def‘ ü teslîme ta‘ahhüd ettikden sonra mütevelliye vekîli hâzır-ı [132] mezbûr Mehmed Rifat Efendi dahi mezbûre Hatice Kadın’ın tasarrufuna izin vermekle bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 12 C sene [12]58