İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 408 Hüküm no: 358 Orijinal metin no: [132-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vakıf menzil satışından dolayı Külahçı Ali Ağa ile Havva Hatun ve kocası Mehmed’le olan anlaşmazlıklarında sulh olup zimmet ibrası yaptıkları Menzil nizâ‘ı [Ma‘rûz] Sâhibe-i arzuhâl mu‘arrefetü’z-zât Hatice Hatun bt. Abdullah bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından mürsel Kâtib es-Seyyid Ali Rıza Efendi hâzır olduğu hâlde meclis-i şer‘-i münîrde derûn-ı arzuhâlde mezkûrü’l-ism Külahcı Ali Ağa b. Halil muvâcehesinde nefsinden asıl ve zevci Dellâl es-Seyyid Mehmed b. Mehmed Said tarafından husûs-ı âtîde vekîl-i müsecceli kezâlik mu‘arrefetü’z-zât Şerife Havva Hatun bt. Mustafa hâzıra olduğu hâlde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Mîr Piyâde Ali Ağa Vakfı müsakkafâtından bâ-temessük-i mütevellî bi’l-icâreteyn mutasarrıfe olduğum el-yevm zevcân-ı asıl ve vekîl ve müvekkil-i mezbûrân Şerife Havva Hatun ve es-Seyyid Mehmed’in vâzı‘ıyyü’l-yed oldukları İstanbul’da Yenibahçe civârında Karabaş mahallesinde kâin bir bâb harâb vakıf menzili işbu sene-i mübâreke Muharremi’l-harâmının on ikinci günü mezbûr Ali Ağa emir ve tevkîlimle ben diyâr-ı âharda iken gāibe ani’l-meclis Fatıma Hatun bt. Hüseyin’e iki yüz elli guruş mukābelesinde bi’l-vekâle ferâğ-ı kat‘î ve re’y-i mütevellî ile ferâğ ve tefvîz etmekle bedeli olup gāibe-i mezbûrenin benim için teberru‘an verip mezbûr Ali Ağa dahi bi’l-vekâle benim için makbûzu olan meblağ-ı merkūm iki yüz elli guruş yedinde kalıp ve gāibe-i mezbûre Fatıma Hatun dahi ber-vech-i muharrer mutasarrıfe olduğu menzil-i mezkûru sene-i merkūme Saferi’l-hayrının yirmi beşinci günü zevcân-ı mezbûrâna ale’l-iştirâki’s-seviyy bâ-re’y-i mütevellî fâriğa oldukdan sonra ben diyâr-ı âhardan geldiğimde mezbûr Ali Ağa ber-vech-i muharrer makbûzu olup yedinde kalan meblağ-ı mezkûr iki yüz elli guruşu bana tamamen def‘ ü teslîm eylediğinden mâ‘adâ el-hâletü hâzihî benim fakr-ı hâlime merhameten rızâsıyla kendi mâlından dahi teberru‘an altmış guruş bana def‘ ü teslîm ben dahi ahz u kabz ve istihlâk etmemle bi’l-cümle husûs-ı mezkûra ve menzil-i merkūma müte‘allika âmme-i da‘vâdan ben mezbûr Ali Ağa ile zevcân-ı asıl ve vekîl ve müvekkil-i mezbûrân Şerife Hava Hatun ve es-Seyyid Mehmed’in zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde mezbûr Ali Ağa dahi kezâlik husûs-ı mezkûra ve cihet-i karzdan olarak benden mutâlebe eylediği yüz kırk guruşa müte‘allika âmme-i da‘vâdan benim zimmetimi ibrâ-i âm ile ibrâ ve iskāt ve ben ve mezbûr Ali Ağa ve hâzıra-i asıl ve vekîl-i mezbûrdan her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 13 C sene 1258