İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 409 Hüküm no: 359 Orijinal metin no: [132-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa ile kızı Şerife Fâtımatü’z-zehra’nın Zenbilci Mebruk ile olan alacak verecek davasında sulh olup zimmet ibrası yaptıkları Nüsha-i sâniye verilmişdir. 2000 [guru]şa sulh [Ma‘rûz] Mukaddemâ İstanbul Balkapanı tüccârından derûn-ı arzuhâlde mezkûrü’l-ism A‘mâ el-Hâc İsmail Ağa b. Hüseyin nâm kimesnenin sulbiye-i kebîre kızı ve tarafından husûs-ı âti’l-beyânda vekîl-i müseccel-i şer‘îsi mu‘arrefetü’z-zât Şerife Fâtımatü’z-zehra Hatun meclis-i şer‘-i enverde sâhib-i arzuhâl Zenbilci Mebruk b. Mehmed nâm kimesne muvâcehesinde pederim ve müvekkilim mezbûr el-Hâc İsmail Ağa bin iki yüz elli üç senesi Cumâdelâhiresinin yirmi dördüncü günü mezbûr Mebruk’a mâlından fâide-i hâsıla beynlerinde beraber iktisâm olunmak üzere bi-tarîki’l-mudârebe dört bin yüz guruş def‘ ü teslîm eylediğimde ol dahi ber-vech-i meşrûh üzere meblağ-ı mezkûru yedinden ahz u kabz ve sene-i sâbıkā yani bin iki yüz elli yedi senesi Cumâdelâhiresinin yirmi dördüncü gününe gelince dört sene müddet meblağ-ı mezkûru envâ‘-ı zenbil bey‘ ü şirâsında i‘mâl ve ticâret edip ba‘dehû mâl-ı mudârebe nakd iken fesh-i akd-i mudârebe etmeleriyle müvekkilim mezbûrun re’s-i mâlı olup mezbûr Mebruk’un zimmetinde ta‘alluk eden meblağ-ı merkūm dört bin yüz guruş ile fâide-i hâsıladan ber-vech-i mukāvele hissesine isâbet edip yine zimmetine ta‘alluk eden üç bin guruş ki cem‘an yedi bin yüz guruşun iki bin yüz yetmiş guruşunu mezbûr Mebruk pederin ve müvekkilin mezbûr el-Hâc İsmail Ağa’nın emriyle hâlâ dâmâd zevcin gāib ani’l-beled Mehmed Tâhir Ağa’ya teslîm eyledim deyü da‘vâ ben dahi inkâr ve ancak husûs-ı mezkûru zevcim gāib-i mezbûrun mecîisine bi’l-vekâle tevkīf etmemle mâ‘adâsı olan dört bin dokuz yüz otuz guruşu mezbûr Mebruk’dan hâlâ taleb ederim deyü bi’l-vekâle tasaddî eylediğim da‘vâmdan bâ-tavassut-ı muslihîn merkūm Mebruk ile kat‘an-li’n-nizâ‘ bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûr bin guruş ile sâlifü’l-beyân zevcim gāib-i mezbûrun mecîine tevkīf olunan iki bin yüz yetmiş guruşdan mâ‘adâ ziyâde müdde‘âma ve bi’l-cümle husûs-ı mezkûra ve işbu târihe gelince sâir cemî‘ hukūk-ı şer‘iyeye müte‘allika âmme-i da‘vâdan ben pederim ve müvekkilim mezbûra izâfetle mezbûr Mebruk’un zimmetini bi’l-vekâle ibrâ-i âmm-ı sahîh-i şer‘î ile ibrâ ve iskāt eylediğimde mezbûr Mebruk dahi pederim ve müvekkilim mezbûrdan mütâlebe eylediği iki senelik iki bin sekiz yüz seksen guruş ecr-i müsemmâ da‘vâsına ve mârrü’l-beyân tevkīf olunan iki bin yüz yetmiş guruşdan mâ‘adâ zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden müvekkilim mezbûrun zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını asâleten ve vekâleten kabûl eyledik deyü <> ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin guruşu müdde‘iye-i vekîl-i mezbûre Şerife Fâtımatü’z-zehra Hatun’a bi’t-taleb edâ ve teslîme merkūm Mebruk’a tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 19 Ca sene 1258