İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 415 Hüküm no: 365 Orijinal metin no: [134-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ev satışında meydana gelen anlaşmazlığın sulh ile sonuçlandığı Mekteb-i Tıbbiye civârında iki bâb menzil şirâ‘ından 3000 [guru]şa sulh [Ma‘rûz] Teba‘adan sâhib-i arzuhâl İsmail Ağa b. İbrahim bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen bi’d-defa‘ât Çarşamba günleri huzûr-ı hazret-i Fetvâ-penâhî’de ve ba‘dehû şifâhen sâdır olan fermân-ı âlîlerine imtisâlen müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde Bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde zikri [135] âtî muhterik iki bâb vakıf menzil arsalarına bâ-temessük-i mütevellî mutasarrıfe ve vaz‘-ı yedi mütehakkık olan derûn-ı arzuhâlde mastûretü’l-ism Maryem bt. Arakil v. Atam Nasrâniyenin zevci ve tarafından husûs-ı âti’l-beyânda vekîl olduğu şahsını ârifân Mustafa Efendi b. İbrahim ve Mehmed Efendi b. Ali nâm kimesneler şehâdetleriyle ber-nehc-i şer‘î sâbit olan Sarrâf Oseb v. Abram zimmî muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan <> merhûm Arnavud Mehmed Ağa Vakfı’nın hâlâ mütevellîsi eş-Şeyh Mehmed Emin Efendi tarafından mürsel vekîl-i şer‘îsi Süleyman Efendi b. Yahya ile Osman Ağa b. Mehmed ve Helvacı İsmail b. Ahmed ve Hasan Ağa b. Hasan hâzır oldukları hâlde vakf-ı mezkûr müsakkafâtından mahrûse-i Galata’ya muzâfe kasaba-i Tophâne’de Kuloğlu mahallesinde Mekteb-i Tıbbiye-i Adliye verâsında kâin üç tarafdan müvekkile-i mersûme Maryem Nasrâniye menzili ve taraf-ı râbi‘i tarîk-i âm ile mahdûd biribirine muttasıl muhterik iki bâb vakıf menzil arsaları vâlidem Saraylı Münevvere Kadın bt. Abdullah b. Abdurrahman’ın bâ-temessük-i mütevellî bi’l-icâreteyn taht-ı tasarrufunda olup bin iki yüz otuz sekiz senesi hilâlinde fevt oldukda arsa-i mezkûreler hasbe’l-âde bana intikāl etmiş iken müvekkile-i mesfûre Maryem Nasrâniye arsa-i mezkûreleri menzil-i mezkûru ittisâlinde olmak takrîbiyle bi-gayrı hakkın fuzûlî zabt u tasarruf ve vaz‘-ı yed etmekle suâl olunup bâ-re’y-i mütevellî keff-i yedine tenbîh olunmak murâdımdır deyü da‘vâ eylediğimde vekîli sarrâf-ı mersûm Oseb zimmî dahi cevâbında arsa-i mezkûreler vâliden mezbûre Saraylı Münevvere Kadın bt. Abdullah b. Abdurrahman’ın ber-vech-i muharrer taht-ı tasarrufunda iken hâmiş-i arzuhâlde mastûr defter-i vakfdan muhrec derkenâr nâtık olduğu üzere bin iki yüz kırk senesi Zilhiccetü’ş-şerîfesinin onuncu günü hayatında arsa-i merkūmeleri Fatıma Hatun bt. Abdullah’a bâ-re’y-i mütevellî ferâğ ve tefvîz ol dahi ber-vech-i muharrer tefevvüz ve kabûl ettikden sonra vâliden mezbûre fevt olup mezbûre Fatıma Hatun arsa-i mezkûrelere mutasarrıfe iken ol dahi bin iki yüz elli beş senesi Zilhiccesinin yirmi üçüncü günü <> arsa-i merkūmeleri <> hâzırân-ı mezbûrân Osman Ağa ve Helvacı İsmail’e ale’l-iştirâki’s-seviyy bâ-re’y-i mütevellî ferâğ ve tefvîz onlar dahi ber-vech-i muharrer tefevvüz ve kabûl ve bin iki yüz elli altı senesi şehri Rebî‘ülevvelinin on üçüncü günü arsa-i mezkûreleri hâzır-ı mezbûr Hasan Ağa’ya bâ-ma‘rifet-i mütevellî ferâğ ve tefvîz ol dahi ba‘de’t-tefevvüz sene-i merkūme Şa‘bâni’l-mu‘azzamının yirminci günü arsa-i mezkûreleri zevcem ve müvekkilem mesfûre Maryem Nasrâniyeye bâ-re’y-i mütevellî ferâğ ve tefvîz ol dahi tefevvüzüne ruhsat-ı seniyye erzânî ve ol-bâbda emr-i âlî sudûr buyurulduğuna binâen tefevvüz ve kabûl edip ol-vechile arsa-i mezkûreler zevcem ve müvekkilem mersûmenin dâhil-i havza-i tasarrufu olmağla bi-hakkın vaz‘-ı yed eder deyü mütevellî vekîli hâzır-ı mezbûr Süleyman Efendi ve hâzırûn-ı mezbûrûn Osman Ağa ve Helvacı İsmail ve Hasan Ağa tasdîkleriyle bi’l-vekâle def‘e tasaddî ben dahi def‘-i mezkûrunu inkâr eylediğimde vekîl-i sarrâf-ı mersûm ber-vech-i muharrer def‘-i mezkûrunu isbât üzere iken beynimize muslihûn tavassut edip vekîl-i mersûm Oseb zimmî bi-tarîki’s-sulh zevcesi ve müvekkilesi mersûme Maryem Nasrâniyenin mâlından üç bin guruş bana def‘ ve teslîm eylediğinde ben dahi yedinden ahz u kabz ve istihlâk etmemle bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben müvekkile-i mersûme Maryem Nasrâniye ile zevci ve vekîli mesfûr Oseb zimmînin zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde vekîl-i sarrâf-ı mersûm dahi zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden kezâlik benim zimmetimi ibrâ-i âmm-ı sahîh-i şer‘î ile bi’l-asâle <> ve zevcesi ve müvekkilesi mersûmeye izâfetle bi’l-vekâle ibrâ ve iskāt ve tarafeynden her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 22 C sene 1258