İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 417 Hüküm no: 366 Orijinal metin no: [135-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin iş ortağı Osman hakkındaki iddiasını ispatlayamadığı 1886 [guru]şa men‘ Derûn-ı arzuhâlde mezkûrü’l-ism Halatcı el-Hâc Ahmed Efendi b. İsmail Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde şerîki sâhib-i arzuhâl Trabzonî Osman b. Mehmed muvâcehesinde bin iki yüz elli beş senesi ben sekiz bin yüz guruş ve mezbûr Osman dahi üç bin guruş ki cem‘an mâlımızdan on bir bin yüz guruş ifrâz ve biribirine halt edip fâide beynimizde beraber iktisâm olunmak üzere vücûh-ı ticâretde akd-i şirket-i inân edip mezbûr Osman kabzımâl olmağla meblağ-ı merkūmu bir müddet i‘mâl edip ba‘dehû sene-i sâbıkā yani bin iki yüz elli yedi senesi Cemâziyelevvel’inin on beşinci günü şirket-i mezkûrenin hesâbını mezbûr ile rü’yet eylediğimizde lede’l-muhâsebe benim fâide-i hâsıladan hisseme isâbet eylediği zâhir olan bin sekiz yüz seksen altı guruşun sekiz yüz seksen altı guruşunu bana def‘ ve teslîm etmekle bâkīsi olan bin guruş yedinde kaldığından mâ‘adâ on bir bin yüz guruş re’s-i mâl şirket-i merkūma nakd olarak şerîkim mezbûr yedinde mevcûd iken her birimiz şirket-i mezkûreyi kemâ-kân ibkā birle şerîkim mezbûr târih-i merkūm ile müverrah işbu bir kıt‘a şirketnâmeyi yedime i‘tâ ettikden sonra iznimle re’s-i mâl-ı merkūmu metâ‘a bozdukda vilâyet-i Anadolu’da Bigadiç kasabasına götürüp onda bey‘ ve semenlerini Kırkağaç kasabasına götürüp onda a‘mâl ile ticârete ben mezbûr Osman’a izin vermemle ol dahi metâ‘-ı mezkûru zikr olunan Bigadiç kasabasına götürüp onda on iki bin beş yüz guruşa bey‘ ve kabz-ı semen ve ba‘dehû sâlifü’l-beyân Kırkağaç kasabasına gelip onda semen-i merkūmu a‘mâl etmekle el-hâletü hâzihî şirket-i mezkûrenin hesâbı rü’yet olunup re’s-i mâlım olan meblağ-ı merkūm sekiz bin yüz guruş ile fâide-i hâsıladan hisseme isâbet <> edip yedinde zuhûr eden mikdârı ve sâlifü’l-beyân mukaddemâ fâide-i hâsıladan hisseme isâbet eden bin sekiz yüz seksen altı guruşdan bâkī yedinde kalan bin guruşu dahi mezbûr Osman’dan taleb ederim deyü da‘vâ ettikde ol dahi cevâbında mukaddemâ şerîkim müdde‘î-i mezbûr el-Hâc Ahmed Efendinin fâide-i hâsıladan hissesine isâbet eden meblağ-ı mezkûr bin sekiz yüz seksen altı guruşu şerîkim mezbûra tamamen def‘ ü teslîm eyledim ve ben semen-i merkūm on iki bin beş yüz guruş ile zikr olunan Kırkağaç kasabasında ticâret için işbu sene-i mübârekede duhûl eden Mart’ın yirmi ikinci günü mârrü’l-beyân Bigadiç kasabasından [136] üç nefer refîk ile çıkıp sâlifü’z-zikr Kırkağaç kasabasına gider iken esnâ-i râhda Eğridere nâm mahâlde sekiz nefer eşkıyâ zuhûr ve beni ve refîklerim mezbûrûnu ahz ve bir sîm sâ‘at ve bir çift piştovu ve meblağ-ı mezkûr on iki bin beş yüz guruşu ve refîklerim mezbûrûnun dahi ba‘zı mâllarını gāret edip biz def‘e kādirler olarak deyip ve yedimde bir akçe ve bir habbe kalmayıp üzerime redd ve damân lâzım olmadığına yemîn dahi ederim deyü eylediği def‘lerini müdde‘î-i mezbûr el-Hâc Ahmed Efendi inkâr etmekle bu sûretde mezbûr Osman eylediği def‘lerinde yemîniyle tasdîk olunur ümenâdan olup lâkin müdde‘î-i mezbûr el-Hâc Ahmed Efendi merkūm Osman’ı tahlîfden ibâ ve imtinâ‘ etmeğin mûcebiyle müdde‘î-i mezbûr el-Hâc Ahmed Efendi da‘vâ-yı mezkûreleriyle mezbûr Osman’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 27 Ca sene 1258