İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 418 Hüküm no: 367 Orijinal metin no: [136-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Satılan cariyenin ayıplı olmadığının anlaşıldığı Câriyenin bikri men‘i [Ma‘rûz] Hâlâ Evkāf-ı Hümâyûn Hazînesi tarafında Evâmir-i aliyye müdîri sâhib-i arzuhâl Mehmed Said Efendi b. İbrahim tarafından husûs-ı âti’l-beyânda vekîl olduğu Mehmed Salih Bey b. İbrahim ve el-Hâc Ömer b. Hüseyin nâm kimesneler şehâdetleriyle sâbit olan Hafız Mehmed Efendi b. İbrahim meclis-i şer‘-i münîrde derûn-ı arzuhâlde mezkûretü’l-ism mu‘arrefetü’z-zât Âişe Hanım bt. Ahmed muvâcehesinde müvekkilim mezbûr Mehmed Said Efendi’nin işbu sene-i mübâreke Muharremi’l-harâmının onuncu günü bikr olmak üzere yirmi üç bin guruş semen-i medfû‘ ve makbûza mezbûre Âişe Hanım’dan iştirâ ve kabz eylediği işbu hâzıratü bi’l-meclis orta boylu kara gözlü bir re’s Çerkes câriye hâlâ seyyib ve fos olmağla redd-i mebî‘ ve istirdâd-ı semen bi’l-vekâle matlûbumdur dedikde evvelen teveccüh-i husûmet için câriye-i merkūme kavâbile irâet olundukda onlar dahi ba‘de’n-nazar câriye-i mezbûrenin seyyib ve fos olmayıp sahîhan bikr olduğunu haber verdiklerinden mâ‘adâ hâlâ Reisü’l-etibbâ-i hazret-i cihân-dârî ve Sadr-ı vâlâ-yı Rumeli devletlü fazîletlü Abdülhak Efendi hazretleri dahi hâmiş-i arzuhâlde mastûr olduğu üzere i‘lâm etmeleriyle ol-vechile teveccüh-i husûmet bulunmamağla müdde‘î-i vekîl-i mezbûr Hafız Mehmed Efendi da‘vâ-yı mezkûresiyle mezbûre Âişe Hanım’a bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 29 C sene 1258