İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 419 Hüküm no: 368 Orijinal metin no: [136-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın kefaletinden doğan borcunu ödemesi 2497 [guru]ş hüküm [Ma‘rûz] Hâlâ İstanbul’da vâki‘ Tahmis müdîri bâ‘isü’l-i‘lâm el-Hâc Mehmed Salih Ağa b. Halil meclis-i şer‘-i münîrde mukaddemâ Tahmisönü attârlarından ve hâlâ kâğıdcı esnâfından es-Seyyid Mustafa Ağa b. İsmail muvâcehesinde mezbûr es-Seyyid Mustafa Ağa’nın sâlifü’l-beyân Tahmisönü’nde vâki‘ mutasarrıf olduğu bir bâb dükkânında müsteciri olan Attâr İbrahim Edhem Ağa b. Ahmed hâzır olduğu hâlde hâzır-ı mezbûr İbrahim Edhem Ağa’nın bir müddetden beri mâlımdan ve yedimden iştirâ ve kabz eylediği meshûk kahve semeninin hesâbını sene-i sâbıkā yani bin iki yüz elli yedi senesi Zilhiccetü’ş-şerîfesinin on beşinci günü hâzır-ı mezbûr ile zikr olunan Tahmis odasında yegân yegân sehv ü galatdan ârî hesâb-ı sahîh ile rü’yet eylediğimizde lede’l-muhâsebe hâzır-ı mezbûr İbrahim Edhem Ağa zimmetinde cihet-i mezkûreden yirmi dört bin yedi yüz dokuz guruş alacak hakkım zuhûr ettikde meblağ-ı merkūm bana zimmetinde sahîhan deyni olduğunu ikrâr-ı kat‘î ile ikrâr edip meblağ-ı merkūm yirmi dört bin yedi yüz dokuz guruşa mezbûr es-Seyyid Mustafa Ağa tarafeynden bi’l-emr ve’l-kabûl kefâlet-i mutlaka ile kefîl ve zâmin olmağla meblağ-ı mezkûr yirmi dört bin yedi yüz dokuz guruşu kefâlet-i mahkiyesine binâen mezbûr es-Seyyid Mustafa Ağa’dan hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr el-Hâc Mehmed Salih Ağa ber-vech-i muharrer müdde‘âsını sâlifü’z-zikr Tahmisönü attârlarından el-Hâc İbrahim Ağa b. Ömer ve Hafız Abdullah Efendi b. Ali ve İbrahim İbiş Ağa b. Mehmed Sadık ve Hasan Ağa b. Abdullah ve es-Seyyid Ömer Ağa b. es-Seyyid Hüseyin nâm kimesneler şehâdetleriyle bi’l-muvâcehe ber-nehc-i şer‘î isbât ettikde mezbûr es-Seyyid Mustafa Ağa müdde‘î-i mezbûrun ber-vech-i muharrer müdde‘âsını bi-tamamihi tâyi‘an ve kat‘iyyen ikrâr ü i‘tirâf etmeğin mûcebince meblağ-ı merkūm yirmi dört bin yedi yüz dokuz guruşun bi-hükmi’l-kefâle müdde‘î-i mezbûr el-Hâc Mehmed Salih Ağa’ya edâsıyla mezbûr es-Seyyid Mustafa Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 2 Receb sene 1258