İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 419 Hüküm no: 369 Orijinal metin no: [136-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey ile zevcesi Latife’nin aralarındaki husumeti bitirip anlaşmaları hususunda uyarılması 1000 [guru]ş da‘vâsından meccânen fâriğ [Ma‘rûz] Bâ‘isetü’l-i‘lâm Latife Hanım ibnetü’l-müteveffâ Mehmed Âtıf Bey ibnü’l-merhûm Hasan Tahsin Efendi tarafından husûs-ı âti’l-beyânda vekîl olduğu zâtını ârifân Mehmed Salih Bey b. Ali ve Mehmed Seyda Bey b. Mehmed Âtıf şehâdetleriyle ber-nehc-i şer‘î sâbit olan Osman Ağa b. Mustafa meclis-i şer‘-i münîrde müvekkile-i mezbûrenin hâlâ zevci İsmail Bey ibnü’l-müteveffâ Ebniye-i hâssa müdîri esbak Mahmud Efendi muvâcehesinde mezbûr İsmail Bey bin iki yüz elli üç senesi Recebi’l-müreccebi hilâlinde üç bin beş yüz guruş mehr-i mu‘accel-i müstevfâ ve dört bin elli bir guruş mehr-i müeccel tesmiyesiyle müvekkilem mezbûre Latife Hanım’ı tezevvüc ve duhûl ettikde mâlından zevcesi mezbûre Latife Hatun’a hibe ve temlik ve teslîm ve ba‘dehû sene-i merkūme Şevvâli’l-mükerreminin on yedinci günü bi-gayrı hakkın fuzûlî ahz u kabz ve âhara bey‘ ü teslîmle istihlâk eylediği cem‘an on bin guruş kıymetli iki aded mücevher çiçeğin kıymet-i mezkûrelerini mezbûr İsmail Bey’den bi’l-vekâle hâlâ tazmîn taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf edip lâkin ben zikr olunan çiçekleri mukaddemâ âhardan iştirâ eylediğimde semenleri olan cem‘an on dört bin guruşu mücerred kendi mâlımdan vermemle öyle olucak müdde‘î-i vekîl-i mezbûrun müvekkilesi zevcem mezbûreye hibe ve teslîm ettiğimden sonra geri ahz ve âhara bey‘ ve teslîmle benden kıymet-i mezkûresi lâzım gelmez deyü îrâd eylediği kelâmı meşrû‘ ve iltifâta şâyân olmadığı mezbûr İsmail Bey’e tefhîm olundukda dönüp zevcem müvekkile-i mezbûre Latife Hanım ber-vech-i muharrer mehr-i mu‘accelini istifâ etmiş iken bana itâ‘at etmeyip âharın menzilinde sâkine olmağla İstanbul’da Zeyrek civârında Hoşkadem mahallesinde tedârik ve müheyyâ eylediğim galak ve merâfıkı başka mesken-i şer‘î olan menzile gelip bana itâ‘at ve inkıyâd etmek üzere zevcem mezbûreye tenbîh olunsun ve zikr olunan mücevher çiçeklerin kıymet-i mezkûreleri olan on bin guruşu dahi zevcem mezbûreye hâlen ve def‘aten edâya kudretim olmamağla işbu târih-i i‘lâmdan bir ay tamamına değin meblağ-ı mezkûru kendine edâ etmek üzere beni imhâl yâhûd râzıye olur ise müddet-i merkūme tamamına değin meblağ-ı merkūm mukābelesinde ben âhardan bi’l-iştirâ iki mücevher çiçek kendine vermek üzere tevkīf etsin dedikde müdde‘î-i vekîl-i mezbûr Osman Ağa dahi minvâl-i muharrer üzere bi’l-vekâle imhâl ve tevkīf eylediğinden mâ‘adâ ba‘de’l-yevm müvekkilesi mezbûre Latife Hanım zevci mezbûr İsmail Bey’in tedârik ettiği menzil-i mezkûra gidip kendine itâ‘at ve inkıyâda ve mezbûr İsmail Bey’in dahi zevcesi müvekkile-i mezbûreye bi-gayrı hakkın cevr ü ezâ etmeyip hukūk-ı zevciyete mürâ‘ata ve ber-vech-i muharrer meblağ-ı mezkûr on bin guruşu edâya yâhûd mukābelesinde iki mücevher çiçek tedârik birle zevcesi mezbûreye vermeye tarafeynden her biri bi’l-asâle ve bi’l-vekâle ta‘ahhüd edip bu vechile kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu] Fî 23 C sene 1258