İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 424 Hüküm no: 371 Orijinal metin no: [138-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevini kötüye kullanan İsmail Halife’nin yerine Mustafa Halife’nin imam tayin olunması İmâmet tevcîhi istid‘âsı [Ma‘rûz] Ashâb-ı arzuhâl İstanbul’da Yaylayokuşu nezdinde Aydın Kethudâ Câmi‘-i şerîfi mahallesi muhtârları Bezzâzistânî es-Seyyid Mustafa Efendi b. el-Hâc Mehmed Salih ve es-Seyyid Mahmud Ağa b. es-Seyyid Mehmed ve ahâlisinden es-Seyyid Mehmed Nuri Ağa b. Yahya ve Na‘lband es-Seyyid Hasan Ağa b. Ahmed ve Sîmkeş es-Seyyid Ahmed Ağa b. Mehmed Emin ve Derviş Mustafa Efendi b. Mehmed ve Mustafa Ağa b. Ömer ve Koltukçu Mehmed Salih Ağa b. Süleyman ve Yorgancı Ömer Ağa b. Mustafa ve Basmacı Mehmed Emin Ağa b. Mehmed ve Dülger İbrahim Edhem Ağa b. Mehmed Sadık ve Sîmkeş Mehmed Salih Ağa b. Mehmed Haşim ve Mehmed Haşim Ağa b. <> Osman ve Esirci Süleyman Ağa b. Ömer ve Berber Ali Ağa b. Halil ve Nişastacı Mehmed Ağa b. Ahmed ve İsmail Ağa b. Ahmed ve Bezzâzistânî Ahmed Ağa b. Ali ve Dolabçı Hüseyin Ağa b. Ahmed ve Basmacı Mustafa Ağa b. Ali ve Dibekçi Osman Ağa b. Hüseyin ve teba‘adan el-Hâc Ahmed Ağa b. Mehmed ve Kâğıdcı Hüseyin Ağa b. Osman ve Berber Osman Ağa b. Ali ve Münâdî Ahmed Ağa b. Osman ve Papuççu Halil Ağa b. Ahmed ve es-Seyyid Abdullah Ağa b. es-Seyyid Ahmed ve sâirleri bi’l-ma‘iyye rü’yete memûr Evkāf-ı hümâyûn müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde bâ-irâde-i seniyye Hazîne-i Evkāf-ı Hümâyûn tarafından idâre olunan câmi‘-i şerîf mezkûr vakfından olmak üzere yevmî üç akçe vazîfe ile imâmet ve yevmî dört akçe vazîfe ile müezzinlik cihetleri ile Ulak Çelebi Vakfı’ndan olmak üzere vazîfe-i mu‘ayyene ile imâmete meşrûta câmi‘-i mezkûrun hitâbet cihetine mutasarrıf olan derûn-ı arzuhâlde mezkûrü’l-ism es-Seyyid İsmail Halîfe b. Hüseyin muvâcehesinde mezbûr es-Seyyid İsmail Halîfe cihât-ı mezkûreyi işbu sene-i mübâreke şehr-i Rebî‘ül-evvelinin on beşinci günü el-Hâc Mehmed Halîfe b. Hasan nâm kimesnenin ferâğ ve kasr-ı yedinden tefevvüz etmiş ise de lâkin mahalle-i mezkûreye duhûl ve hurûc ve diyâr-ı âhara azîmet eden kimesnelere hilâf-ı emr-i âlî on beşer ve yirmi beşer guruş ahz etmedikçe iktizâ eden tezkirelerini vermeyip ve dâimâ içimizde türlü fesâd peydâ ve bizi biribirimize gamz ve infâk [nifak] ilkā etmekle biribirimize düşürüp nizâ‘ ve mücâdele ve ifk ü iftirâ ile tekdîr ettirdip ol-vechile mezbûr es-Seyyid İsmail Halîfe’nin imâmetinden cümlemiz istikrâh etmekle cihât-ı mezkûre üzerinden ref‘ olunmak murâdımızdır deyü her biri muvâcehesinde mezbûrun iktidâya münâfî sû’-i hâlini ihbâr ve cihât-ı mezkûre âhar ehil ve müstahak kimesneye tevcîh buyurulmasını istid‘â ettiklerinden sonra mezbûr es-Seyyid İsmail Halîfe şifâhen sâdır olan fermân-ı âlîlerine imtisâlen müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde bâb-ı cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde ahâli-i mahalle-i mezbûrûn hâzır oldukları hâlde mutasarrıf olduğu cihât-ı mezkûreyi hüsn-i rızâsıyla ahâli-i mahalle-i mezbûrûnun muhtârları olup ehil ve müstahak olduğu lede’l-imtihân zâhir ve nümâyân olan Mustafa Halîfe b. Abdullah’a ferâğ ve kasr-ı yed ve atik tezkiresini teslîm ettikde ol dahi tefevvüz ve kabûl eylediğinden mâ‘adâ ahâli-i hâzırûn-ı mezbûrûn rızâlarıyla kendi mâllarından teberru‘an mezbûr es-Seyyid İsmail Halîfe’ye bin beş yüz guruş def‘ ü teslîm edip ol dahi yedlerinden ahz u kabz etmekle cihât-ı mezkûre mezbûr es-Seyyid İsmail Halîfe’nin ber-vech-i muharrer ferâğ ve kasr-ı yedinden merkūm Mustafa Halîfe’ye bâ-arz-ı nâzır-ı Evkāf-ı Hümâyûn tevcîh buyurulmak iktizâ eylediği huzûr-ı âlîlerine i‘lâm olundu. Fî 2 Receb sene 1258