İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 425 Hüküm no: 372 Orijinal metin no: [138-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap gediğinin satışı Kasab [Ma‘rûz] Cennet-mekân <> adn-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla dördüncü selhhâneye merbût kasab dükkânlarından mahrûse-i Galata’da [139] Kulekapısı civârında berber ve çörekçi dükkânları beynlerinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeye babası hâlik Anaştaş v. Yanko zimmînin intikālinden bâ-temessük-i mütevellî müstakıllen mutasarrıf olup sinn ü cüssesinin bulûğa tahammülü olmağla bulûğunu mukırr u mu‘terif ve hâlâ âkıl ve bâliğ ve bulûğuna rüşdü munzam ve umûrunu bi’n-nefs görmeye kādir dahi idiği lede’t-tezkiye adl ve makbûlü’ş-şehâde idikleri ihbâr olunan kasab tâifesinden es-Seyyid Ebûbekir Ağa b. Ahmed ve İbrahim Ağa b. Hasan ve Mahmud Ağa b. Mehmed nâm kimesneler ile Mitro v. Liko ve Hıristo v. Petro nâm zimmîler şehâdetleriyle muvâcehe-i hasm-ı şer‘îde ber-nehc-i şer‘î sâbit ve mütehakkık olan derûn-ı arzuhâlde ismi mastûr Kosti zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde meclis-i şer‘-i hatîrde tâife-i mezkûreden arzuhâl sâhibi Petro v. Temyo zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı gedik-i merkūma minvâl-i muharrer üzere el-yevm mutasarrıf ve vâzı‘ü’l-yed olup lâkin mersûm Petro zimmî âlât-ı lâzıme-i merkūmeye mukaddemâ tâife-i mezkûreden es-Seyyid Süleyman b. es-Seyyid es-Seyyid Mustafa ve es-Seyyid Mustafa ve es-Seyyid Mehmed b. es-Seyyid Hasan nâm kimesneler bâ-temessük-i mütevellî bi’l-icâreteyn münâsafeten mutasarrıflar iken mu‘ayyen-i gedik-i merkūmu bin iki yüz kırk altı senesi şehr-i Rebî‘ülevveli evâhirinde mutasarrıfları mezbûrândan sekiz bin guruş bedel mukābelesinde nefsim için tefevvüze baban hâlik-i mersûm Anaştaş zimmîyi sağlığında tarafımdan kabûlüne mukārin tevkîl ve irsâl ettiğimde ol dahi sene-i merkūme şehri Rebî‘ülâhiri gurresinde âlât-ı gedik-i mezkûru mütevellî izniyle meblağ-ı merkūm sekiz bin guruş bedel mukābelesinde benim için mezbûrân es-Seyyid Süleyman ve es-Seyyid Mehmed’den bi’l-vekâle tefevvüz ve kabûl ve bedel-i merkūm sekiz bin guruşu dahi mâlımdan ve yedimden ahz u kabz ve mezbûrâna def‘ ve teslîm etmiş iken gedik-i merkūmun temessüğünü dahi kendi üzerine tahrîr ettirdiğinden âlât-ı gedik-i merkūmu zabt u tasarruf ve vaz‘-ı yed etmiş idi deyü da‘vâya tasaddî ben dahi inkâr ve ol-vechile beynimizde ba‘de vukū‘ı’l-münâza‘a el-hâletü hâzihî ben âlât-ı gedik-i mezkûru hüsn-i rızâ ve tayyib-i ihtiyârım ve ferâğ-ı mu‘teber-i kat‘î ile mersûm Petro zimmîye meccânen bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i merkūmda benim aslâ ve kat‘a alâka ve medhalim kalmayıp <> mersûm Petro zimmînin hakk-ı müfevvezi olmağla gedik-i mezkûra ve ferâğına ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ ve iskāt edip bu vechile kat‘-ı münâza‘a eyledik deyü ba‘de’l-ikrâr ve’t-tasdîk gedik-i mezkûr fâriğ-i mesfûr Kosti zimmînin ferâğından defter-i vakf-ı şerîfde mersûm Petro zimmînin müstakıllen uhdesine kayd ve der-dest olan temessük-i mezkûr hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 29 C sene 1258