İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 427 Hüküm no: 373 Orijinal metin no: [139-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlı Tacir İsmail Ağa’nın haksız yere Osman Efendi aleyhine açtığı rüşvet davasından vazgeçtiği Alacak olmadığını i‘tirâf [Ma‘rûz] İran tüccârından İsmail Ağa b. Mehmed Bâb-ı âlîlerine takdîm eylediği arzuhâline sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde Nezâret-i İhtisâb-ı İstanbul tarafından mahallât [mu‘accelât] odası ketebesinden arzuhâl-i mezkûr derûnunda mezkûrü’l-ism es-Seyyid Osman Efendi b. Mustafa muvâcehesinde mahrûse-i Galata’ya muzâfe kasaba-i Kasımpaşa’da Şabankaptan mahallesinde sâkine kezâlik derûn-ı arzuhâlde mezkûretü’l-ism mu‘arrefetü’z-zât Erzurumlu Hacce Fatıma Hatun bt. Mahmud hâzıra olduğu hâlde mezbûr es-Seyyid Osman Efendi bundan mukaddemce diyâr-ı âhara mürûruma ruhsat zımnında bana cânib-i Nezâret-i İhtisâb’dan bir kıt‘a tezkire alıvermek için mâlımdan rüşvet tarîkiyle beş yüz guruşumu bi-gayrı hakkın ahz u kabz etmiş idi deyü da‘vâya tasaddî etmiş idim lâkin da‘vâ-yı mezkûremin aslı olmayıp ancak ben işbu târih-i i‘lâm senesi Cemâziyelevvel’inin yirminci günü bir takım mâlımı hâzıra-i mezbûre Hacce Fatıma Hatun’a îdâ‘ ve teslîm eylediğimden sonra istirdâd murâd eylediğimde hâzıra-i mezbûreyi bulamayıp kimesnenin ma‘lûmu olmayan bir mahâlde ihtifâ ve mezbûr es-Seyyid Osman Efendi’nin akrabâsından olmak takrîbiyle mukaddemâ mahalle-i mezbûreye mezbûr es-Seyyid Osman Efendi’nin kefâletiyle duhûl etmiş olduğundan hâzıra-i mezbûreyi bulup zâhire ihrâcını mezbûr es-Seyyid Osman Efendi’den matlûb eylediğimde ol dahi imtinâ‘ eylediğine binâen hâzıra-i mezbûreyi ber-vech-i muharrer zâhire ihrâc için da‘vâ-yı mezkûreye mütesaddî ve ol-vechile eylediğim da‘vâmda kâzib ve mubtıl olup mezbûr es-Seyyid Osman Efendi yed ve zimmetinde aslâ ve kat‘a hakkım ve alacağım yokdur deyü mukırr-ı mezbûr İsmail Ağa’nın bi’l-cümle takrîr-i meşrûhunu mezbûr es-Seyyid Osman Efendi tasdîk ve tahkīk eylediği tescîl ve İstanbul Mahkemesi’nden huzûr-ı [âlîlerine i‘lâm olundu] Fî 3 Receb sene 1258