İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 428 Hüküm no: 374 Orijinal metin no: [139-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Nureddin Efendi’nin tasarrufunda bulunan dükkânın kiracılarının ücretlerini düzenli ödedikleri sürece dükkândan çıkarılmalarının uygun olmadığı Aşçı dükkânı nizâ‘ı [Ma‘rûz] Müderrisînden sâhib-i arzuhâl es-Seyyid Yakub Nureddin Efendi b. es-Seyyid İbrahim bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî gedik âlâtına vaz‘-ı yedleri mütehakkık olan derûn-ı arzuhâlde isimleri mezkûr aşçı ve balık tâbeci esnâfından Yako v. Mosi ve Yanto v. Davit ve Hayim v. Mayer nâm Yahûdîler muvâcehelerinde bâ-irâde-i seniyye Hazîne-i Evkāf-ı Haremeyni’l-Muhteremeyn tarafından idâre olunan evkāfdan İstanbul’da vâki‘ Ayasofya-i Kebîr nâm câmi‘-i şerîfi müsakkafâtından İstanbul’da Balıkpazarı kapısı hâricinde Yahûdîler sokağında kebâbcı ve aşçı dükkânı <> ve işkenbeci dükkânı beynlerinde vâki‘ bir bâb ahşâb mağazayı müştemil şehriye yüz seksen dokuz akçe icâre-i müecceleli üç kepenk bir bâb vakıf aşçı ve balık tâbeci dükkânının şehriye elli üç akçe iki pul icâre-i müecceleli ol-mikdâr hisse-i şâyi‘ası bâ-temessük-i mütevellî bi’l-icâreteyn benim taht-ı tasarrufumda <> ve hisse-i şâyi‘a-i merkūmede kirâ-i kadîmesi olan beher şehr beşer guruş kirâ ile mersûmûn Yako ve Yanto ve Hayim Yahûdîler müşâhereten müstecirlerim olup işbu târih-i i‘lâm şehri gāyetine izâfetle fesh-i akd-i icâre etmemle elli üç akçe iki pul hisse-i şâyi‘a-i dükkân-ı mezkûru gāyet-i şehr-i merkūmda bana teslîme mersûmûn Yako ve Yanto ve Hayim Yahûdîlere tenbîh olunmak murâdımdır deyü da‘vâ ettikde onlar dahi cevâblarında elli üç akçe iki pul hisse-i şâyi‘a-i dükkân-ı mezkûr müdde‘î-i merkūmun ber-vech-i muharrer taht-ı tasarrufunda olup ve kendileri beher şehr ol-mikdâr guruş kirâ ile müstecirleri olduklarını her biri ikrâr lâkin dükkân-ı mezkûr derûnunda mevcûde beyne’l-esnâf mu‘teber âlât-ı gedik olup ve gedik-i âlât-ı merkūm yedimizde olan 1245 senesi Şevvâli’l-mükerreminin beşinci günü târihiyle müverraha bir kıt‘a hüccet-i şer‘iye nâtık olduğu üzere ale’l-iştirâki’s-seviyy şirâen ve yedimizde mülkümüz iken âlât-ı merkūmeyi işbu sene-i mübâreke Muharremi’l-harâmının dördüncü günü evkāf-ı Haremeyn-i Muhteremeyn’e teberru‘ ve tashîh ettirerek yevmî üç akçe icâre-i müeccele ile taraf-ı evkāf-ı Haremeyn-i Muhteremeyn’den mâ‘an <> istîcâr ve usûlü üzere birer kıt‘a mütevellî temessüğü ahz etmeleriyle binâen-aleyh kirâ-i kadîme-i mezkûresini edâ ile hisse-i şâyi‘a-i dükkân-ı mezkûru zabt u tasarruf ederiz deyip mazmûnları takrîrlerine mutâbık bir kıt‘a hüccet-i şer‘iye ve üç kıt‘a mütevellî temessüğü ibrâz ettiklerinde müdde‘î-i merkūm es-Seyyid Yakub Nureddin Efendi dahi mazmûn-ı senedât-ı mezkûreyi ikrâr ve tasdîk eylediğinden mâ‘adâ bu makūle Evkāf-ı Haremeyn-i Muhteremeyn’e teberru‘ olunan gediklerin mutasarrıfları mâh be-mâh kirâ-yı kadîmelerini bilâ-cefâ edâ eyledikleri sûretde ihrâc olunmamak evkāf-ı mezkûrenin [140] bâ-hatt-ı hümâyûn-ı şevket-makrûn mer‘î ve mu‘teber nizâmından olmağın mersûmûn Yako ve Yanto ve Hayim Yahûdîlerden hisse-i şâyi‘a-i dükkân-ı mezkûrda kirâ-yı kadîmesini alıp ihrâcıyla rencîde olunmamak muktezâ-yı nizâm idiği müdde‘î-i mezbûr es-Seyyid Yakub Nureddin Efendi’ye tefhîm olunduğu İstanbul Mahkemesi’nden huzûr-ı [âlîlerine i‘lâm olundu] Fî 29 C sene [1]258