İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 432 Hüküm no: 376 Orijinal metin no: [141-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Mahmud Efendi’nin vefat eden Hayriye tüccarından Mahmud Efendi’de olan alacağının terekesinden ödenmesi 14000 [guru]şa hüküm [Ma‘rûz] Tüccârdan sâhib-i arzuhâl Şekerci Mahmud Efendi b. Mustafa meclis-i şer‘-i münîrde İstanbul’da Uzunçarşı kurbünde Bezzâz-ı cedîd mahallesinde sâkin iken bin iki yüz elli sekiz senesi şehr-i Rebî‘ülevvelinin üçüncü günü vefât eden hayriye tüccârından el-Hâc Mahmud Efendi b. İbrahim b. Abdullah’ın verâseti zevce-i menkûha-i metrûkesi Zekiye Hanım bt. el-Hâc İsmail ile sulbî kebîr oğlu el-Hâc İbrahim Edhem Efendi’ye ba‘de’l-inhisâr tereke-i müteveffâ-yı mezbûra vaz‘-ı yedleri mütehakkık olup nefsinden asıl ve vâlidesi zevce-i mezbûre Zekiye Hanım tarafından husûs-ı âti’l-beyânda vekîl-i sâbitü’l-vekâlesi derûn-ı arzuhâlde mezkûrü’l-ism ibn-i mezbûr el-Hâc İbrahim Edhem Efendi muvâcehesinde kezâlik derûn-ı arzuhâlde mezkûrü’l-ism Ali Ağa b. Ahmed hâzır olduğu hâlde ben ve hâzır-ı mezbûr Ali Ağa ve müteveffâ-yı merkūm el-Hâc Mahmud Efendi b. İbrahim b. Abdullah hayatında her birimiz mâlımızdan yüz ellişer bin guruş sermâye vaz‘ıyla hınta ve sâir erzâk bey‘ ü şirâsında inânen şerîkler iken sene-i sâbıkā Şevvâli’l-mükerreminin on beşinci günü hesâbını sehv ü galatdan ârî yegân yegân sahîhan rü’yet eylediğimizde lede’l-muhâsebe benim re’s-i mâl-ı mezkûrumdan olarak mezbûr el-Hâc Mahmud Efendi zimmetinde otuz dokuz bin iki yüz elli guruş alacak hakkım zuhûr eyledikde mezbûr el-Hâc Mahmud Efendi sıhhatinde olduğu hâlde meblağ-ı merkūm otuz dokuz bin iki yüz elli guruş zimmetinde bana deyni olduğunu ikrâr-ı kat‘î ile ba‘de’l-ikrâr meblağ-ı mezkûrun yirmi dört bin dokuz yüz elli guruşunu hayatında kabz ve istifâ etmemle bâkīsi olan on dört bin üç yüz guruşunu dahi kable’l-edâ mezbûr el-Hâc Mahmud Efendi vefât etmekle meblağ-ı bâkī-i merkūm on dört bin üç yüz guruşu asıl ve vekîl ve müvekkile-i mezbûrân el-Hâc İbrahim Edhem Efendi ve Zekiye Hanım’ın vâzı‘ü’l-yed oldukları müteveffâ-yı mezbûrun tereke-i vâfiyesinden hâlâ taleb ederim deyü da‘vâ ettikde asıl ve vekîl-i mezbûr el-Hâc İbrahim Edhem Efendi dahi cevâbında kaziyye minvâl-i muharrer üzere olup meblağ-ı bâkī-i mezkûr on dört bin üç yüz guruş pederi müteveffâ-yı mezbûrun zimmetinde müdde‘î-i mezbûra deyni olduğunu ikrâr lâkin pederim müteveffâ-yı merkūm vefâtından bir hafta mukaddem gāibân ani’l-meclis Habib Efendi zimmetinde alacağı olan beş yüz elli guruş ve Yunanlı Dimitraki zimmetinde bâ-temessük alacağı olan on üç bin yedi yüz elli guruş ki cem‘an on dört bin üç yüz guruşu gāibân-ı merkūmândan kabza ve makbûzunu müdde‘î-i merkūm Mahmud Efendi’ye deyni olan meblağ-ı mezkûr on dört bin üç yüz guruşa takasan teslîme müdde‘î-i merkūm el-Hâc Mahmud Efendi’nin haberi yoğiken hâzır-ı merkūm Ali Ağa’yı tevkîl birle meblağ-ı mezkûr on üç bin yedi yüz elli guruşun temessüğünü hâzır-ı merkūma teslîm edip lâkin hâzır-ı merkūm Ali Ağa gāibân-ı merkūmândan henüz kat‘a nesne ahz ve müdde‘î-i mezbûra teslîm etmemiş ise de mücerred pederim müteveffâ-yı merkūm meblağ-ı mezkûr on dört bin üç yüz guruşu gāibân-ı merkūmândan kabza ve makbûzundan müdde‘î-i merkūma deynini edâya hayatında hâzır-ı merkūmu tevkîl ve temessük-i mezkûru hâzır-ı mezbûra teslîm eylediğine binâen müdde‘î-i mezbûru dahi gāibân-ı mezbûrân üzerlerine havâle etmiş olup öyle olucak müdde‘î-i mezbûr meblağ-ı bâkī-i merkūmu gāibân-ı mezbûrândan mutâlebe etsin deyü sûret-i def‘de îrâd eylediği kelâmı meşrû‘ ve iltifâta şâyân olmadığını mezbûr el-Hâc İbrahim Edhem Efendi’ye ba‘de’t-tefhîm ikrâr ve i‘tirâfı mûcebince meblağ-ı bâkī-i mezkûr on dört bin üç yüz guruşu tereke-i müteveffâ-yı mezbûrdan müdde‘î-i mezbûr Şekerci Mahmud Efendi’ye edâ ve teslîme asıl ve vekîl-i mezbûr el-Hâc İbrahim Edhem Efendi’ye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 14 [Re]ceb sene 1258