İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 435 Hüküm no: 378 Orijinal metin no: [142-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfiye Hanım’ın boşandığı kocası İsmail Bey’e açtığı nafaka ve sair alacak davasında sulh oldukları Ma‘rûz Sâhibe-i arzuhâl Lütfiye Hanım bt. el-müteveffâ Mehmed Âtıf Bey b. el-merhûm Hasan Tahsin Efendi tarafından husûs-ı âti’l-beyânda vekîl olduğu zâtını ârifân Mehmed Salih Bey b. Ali ve mezbûrun li-ebeveyn karındaşı Mehmed Seyda Bey şehâdetleriyle ber-nehc-i şer‘î sâbit olan Osman Ağa b. Mustafa meclis-i şer‘-i münîrde müvekkile-i mezbûrenin zevc-i muhâlı‘ı derûn-ı arzuhâlde mezkûrü’l-ism İsmail Bey b. el-müteveffâ ebniye-i hâssa müdîri esbak Mahmud Efendi tarafından husûs-ı câi’l-beyânda vekîl-i müseccel-i şer‘îsi postahâne ketebesinden el-Hâc Mehmed Râşid Bey b. Mehmed Salih muvâcehesinde müvekkil-i mezbûr İsmail Bey dört bin elli bir guruş mehr-i müeccel tesmiyesiyle müvekkilem mezbûre Lütfiye Hanım’ın zevc-i dâhili olup lâkin beynlerinde hüsn-i mu‘âşeretleri olmamağla müvekkilem mezbûrenin zevci müvekkil-i mezbûr zimmetinde mütekarrir ve ma‘kūdun-aleyh olan meblağ-ı mezkûr dört bin elli bir guruş mehr-i müecceli ile nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere vekîl-i mezbûr el-Hâc Mehmed Râşid Bey ile muhâla‘a-i sahîha-i şer‘iye ile müvekkilem mezbûre Lütfiye Hanım’a izâfetle ben bi’l-vekâle hul‘ olduğumda vekîl-i mezbûr el-Hâc Mehmed Râşid Bey dahi müvekkili mezbûr İsmail Bey’e izâfetle bi’l-vekâle ber-vech-i muharrer hul‘-ı mezkûru ba‘de’l-kabûl hukūk-ı zevciyete ve müvekkil-i mezbûrdan yedimde olan işbu [143] bir kıt‘a i‘lâm-ı şer‘î mantûkunca iki aded müstehlek mücevher çiçek kıymetlerinden bi’l-vekâle müvekkilem mezbûre için mutâlebe eylediğim on bin guruşa ve ibtidâ-i zevciyetlerinden işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben müvekkil-i mezbûr İsmail Bey’in zimmetini ibrâ-i âmm-ı sahîh-i şer‘î ile bi’l-vekâle ibrâ ve iskāt eylediğimde vekîl-i mezbûr el-Hâc Mehmed Râşid Bey dahi zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden müvekkilem mezbûre Lütfiye Hanım ile karındaşı işbu hâzır bi’l-meclis merkūm Mehmed Seyda Bey’in zimmetlerini kezâlik ibrâ-i âmm-ı sahîh-i şer‘î ile bi’l-vekâle ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı âlîlerine i‘lâm olundu. Fî 27 Ca sene [1]258