İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 436 Hüküm no: 379 Orijinal metin no: [143-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hatun’a ait bir evin yarı hissesini uygunsuz şekilde elde eden Nefise Hanım’ın evi Zeliha Hatun’a iade etmesi Fındıklı’da yıkık menzil men‘i [Ma‘rûz] Derûn-ı arzuhâlde mezkûrü’l-ism mu‘arrefetü’z-zât Zeliha Hatun bt. el-Hâc İsmail bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî vakıf menzilin nısf hisse-i şâyi‘asına vaz‘-ı yedi mütehakkık olan sâhibe-i arzuhâl kezâlik mu‘arrefetü’z-zât Şerife Nefîse Hatun bt. Süleyman muvâcehesinde mahrûse-i Galata’ya muzâfe kasaba-i Fındıklı’da Kabataş kurbünde Bağodaları nâm mahâlde merhûme Hacce Fatıma Hanım Mescidi mahallesinde kâin bir tarafdan mezbûre Şerife Nefîse Hatun’un muhterik menzili arsası ve bir tarafdan teba‘adan Mehmed Ağa b. Abdullah menzili ve bir tarafdan hâlâ Bursa kādısı fazîletlü Selim Sırrı Efendi menzili bahçesi ve taraf-ı râbi‘i tarîk-i hâss ile mahdûd iki bâb odayı müştemil bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan mescid-i mezkûr vakfı müsakkafâtından bir bâb vakıf menzilin bâ-temessük-i mütevellî bi’l-icâreteyn mutasarrıfe olduğum nısf hisse-i şâyi‘asını bin iki yüz elli bir senesi Cumâdelâhiresinin sekizinci günü mezbûre Şerife Nefîse Hatun’a izn-i mütevelliyle ferâğ eder olduğumda ölünce[ye dek] beni görüp gözetmek şartıyla ferâğ ve tefvîz eylediğimde ol dahi ber-vech-i muharrer tefevvüz ve kabûl etmekle nısf hisse-i şâyi‘a-i menzil-i mezkûra vaz‘-ı yed edip lâkin ber-vech-i muharrer şartla olan ferâğ-ı mezkûr mu‘teber olmamağla suâl olunup nısf hisse-i şâyi‘a-i menzil-i mezkûru bâ-re’y-i mütevellî bana redd ü ferâğa mezbûre Şerife Nefîse Hatun’a tenbîh olunmak matlûbumdur deyü vakf-ı mezkûrun bi’l-meşrûta hâlâ mütevelliyesi Hacce Fatıma Hatun tarafından mürsel vekîli Hafız Mehmed Efendi b. İbrahim hâzır olduğu hâlde da‘vâ ettikde mezbûre Şerife Nefîse Hatun dahi cevâbında müdde‘iye-i mezbûre Zeliha Hatun ber-vech-i muharrer mutasarrıfe olduğu nısf hisse-i şâyi‘a-i menzil-i mahdûd-ı mezkûru târih-i merkūmda bin guruş bedel-i makbûz mukābelesinde bana bâ-re’y-i mütevellî ferâğ ve tefvîz edip ben dahi tefevvüz ve kabûl etmemle vaz‘-ı yed ederim deyip şart-ı mezkûru mezbûre Şerife Nefîse Hatun ve ol-mikdâr bedel-i kabzını müdde‘iye-i mezbûre Zeliha Hatun’dan her biri inkâr etmeleriyle müdde‘iye-i mezbûre ber-vech-i muharrer müdde‘âsını her biri menzil-i mezkûru mahâllinde tecdîd dahi edip lede’t-tezkiye adl ve makbûlü’ş-şehâde idikleri ihbâr olunan mahalle-i mezkûre civârında Avni Efendi mahallesi ahâlisinden Mehmed Ağa b. Mustafa ve Mehmed Emin Ağa b. Halil nâm kimesneler şehâdetleriyle huzûr-ı hazret-i müşârün-ileyhde bi’l-muvâcehe ber-nehc-i şer‘î isbât edip ve mezbûre Şerife Nefîse Hatun <> dahi müdde‘iye-i mezbûreye ol-mikdâr guruş bedel vermiş idim deyü inkâra mukārin eylediği da‘vâsını isbâtdan izhâr-ı acz birle istihlâf ettikde mezbûre Zeliha Hatun bi’l-muvâcehe vech-i şer‘î üzere tahlîf olunmağın mûcebince mezbûre Şerife Nefîse Hatun da‘vâ-yı mezkûresiyle müdde‘iye-i mezbûre Zeliha Hatun’a bilâ-beyyine mu‘ârazadan ba‘de’l-men‘ nısf hisse-i şâyi‘a-i menzil-i mezkûru dahi bâ-re’y-i mütevellî müdde‘iye-i mezbûre Zeliha Hatun’a redd ü ferâğa mezbûre Şerife Nefîse Hatun’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 10 Receb sene 1258