İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 437 Hüküm no: 380 Orijinal metin no: [143-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çemişgezekli Kömürcü Mehmed’in Eczacı Sotiri’ye açtığı kömürcü mahzen gediği davasında haksız bulunduğu Hevâyî kömürcü gediği men‘i [Ma‘rûz] Sâhib-i arzuhâl Çemişgezekli Kömürcü Mehmed b. el-müteveffâ Kömürcü Mustafa b. İbrahim meclis-i şer‘-i münîrde zikri âtî vakıf menzilin nısf hisse-i şâyi‘asına bâ-temessük-i mütevellî mutasarrıf olan derûn-ı arzuhâlde mastûrü’l-ism Eczâcı Sotiri v. Yorgi zimmî muvâcehesinde keresteci Asvador v. Serkiz zimmî hâzır olduğu hâlde İstanbul hısnı ebvâbından Cebe Ali (Cibâli) kapısından hurûc olundukda sağ tarafda Terzibaşı Yorgaki zimmî mağazası ve Yahûdîhâne beynlerinde kâin bir bâb el-yevm vakıf menzil fi’l-asl senevî kırk sekiz guruş kirâlı kömürcü mahzeni olarak derûnunda olup aklâmda mukayyed gediklerden olmayan hevâyî kömürcü gediği el-Hâc Ömer Ağa ve Ebûbekir Ağa ve İbrahim Ağa nâm kimesnelerin tasarruflarında iken bin iki yüz elli altı senesi Muharremi gurresinde gedik-i merkūmu babam müteveffâ-yı mezbûr Mustafa’ya hayatında yedi yüz guruşa bey‘ ve meblağ-ı mezkûru kabz ve babam mezbûr yedine târih-i merkūm ile müverrah işbu bir kıt‘a temessüğü verdiklerinden sonra babam mezbûr mahzen-i mezkûrda kömürcülük edip kirâ-yı mezkûresini sâl be-sâl mülk mutasarrıfına edâ eder iken bin iki yüz otuz üç senesi hilâlinde ol tarafda vukū‘ bulan harîkde mahzen-i mezkûr muhterik olup arsa-i sırfa kalıp ve beş sene mürûrunda dahi verâseti ancak bana münhasıra olduğu hâlde babam mezbûr Mustafa fevt oldukdan sonra arsa-i mezkûreye bi’l-icâreteyn mutasarrıf olan Zeliha nâm hatun bin iki yüz kırk yedi senesi hilâlinde arsa-i mezkûreyi hâzır-ı merkūm Asvador zimmîye bâ-re’y-i mütevellî ferâğ ve tefvîz ol dahi ba‘de’t-tefevvüz bâ-izn-i mütevellî teberru‘an-li’l-vakf kendi mâlından arsa-i mezkûre üzerine bir bâb menzil binâ ve inşâ ve ba‘dehû arsasıyla mâ‘an menzil-i mezkûru bin iki yüz elli bir senesi hilâlinde mesfûr Sotiri zimmîye bâ-re’y-i mütevellî ferâğ ve tefvîz ol dahi tefevvüz ve kabûl ve kezâlik teberru‘an li’l-vakf kendi mâlından menzil-i mezkûra ba‘zı ebniye ilâve ve ba‘dehû sene-i sâbıkā şehr-i Ramazani’l-mübârekinin dokuzuncu günü menzil-i mezkûrun nısf hisse-i şâyi‘asını uhdesinde ibkā ve mâ‘adâ nısf hisse-i şâyi‘a-i âharını gāib ani’l-meclis Fermeneci Panayot v. Manol zimmîye bâ-ma‘rifet-i mütevellî ferâğ ve tefvîz etmekle mersûm Sotiri zimmî ile gāib-i mesfûr Panayot zimmî menzil-i mezkûra hâlâ vaz‘-ı yed ederler lâkin mücerred menzil-i mezkûr mukaddemâ kömürcü mahzeni iken hevâyî gediği babam müteveffâ-yı mezbûr Mustafa’nın hayatında tasarrufunda olup ve ba‘de’l-vefât bana mevrûs olmuş ve mahzen-i mezkûr el-yevm menzil olmağla öyle olucak mersûm Sotiri zimmî ben gedik-i mezkûru derûnuna nakl ve kömürcülük etmek için âhar mahâlde kendi mâlıyla bir mahzen bana tedârik ve kemâ-fi’l-evvel senevî kırk sekiz guruşa îcâr ve teslîm etsin yâhûd gedik-i merkūm tahmîn ve takvîm olunup kıymetini mâlından bana zâmin olsun deyü takrîr-i meşrûhu üzere tasaddî eylediği da‘vâsı şer‘an ve kānûnen mesmû‘a ve iltifâta şâyân olmadığı müdde‘î-i mezbûr kömürcü Mehmed’e tefhîm olunmağla mûcebiyle da‘vâ-yı mezkûresiyle mesfûr Sotiri zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 15 [Re]ceb sene 1258