İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 438 Hüküm no: 381 Orijinal metin no: [143-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Küçük Serkiz ile İlya’nın kefaletten dolayı olan borçlarını Rukiye Hanım’a ödemeleri [Ma‘rûz] Sâhibe-i arzuhâl Rukiye Hatun bt. Ali b. Abdullah tarafından husûs-ı âti’l-beyânda vekâleti zâtını ârifân Mehmed İzzet Ağa b. Mehmed Tâhir ve Kahveci Mustafa Ağa b. Mehmed Şükrullah nâm kimesneler şehâdetleriyle sâbit olan Mehmed Şükrü Ağa b. el-Hâc Ahmed meclis-i şer‘-i münîrde derûn-ı arzuhâlde mastûriyyü’l-ism Hüseynîci İlya v. Karabet ve Keresteci Küçük Serkiz v. Artin zimmîler muvâcehelerinde müvekkilem mezbûre Rukiye Hatun’un tüccârdan gāib ani’l-meclis Kayseriyeli Agop v. Kigork v. Atam nâm zimmî zimmetinde cihet-i karzdan alacak hakkı olan dört bin guruşa işbu sene-i mübâreke Cumâdelûlâsının gurresinde mersûmân İlya ve Küçük Serkiz zimmîler tarafeynden bi’l-emr ve’l-kabûl kefâlet-i mutlaka ile müte‘âkiben kefîl ve dâminler olup ve târih-i merkūm ile müverrah müvekkilem mezbûre yedine işbu bir kıt‘a deyn tahvîlini dahi vermeleriyle meblağ-ı merkūm dört bin guruşu kefâlet-i [144] mahkiyelerine binâen mersûmân İlya ve Küçük Serkiz zimmîlerden bi’l-vekâle hâlâ taleb ederim deyü da‘vâ ettikde onlar dahi cevâblarında ikrâr ü i‘tirâf etmeğin mûcebince meblağ-ı mezkûr dört bin guruşun bi-hükmi’l-kefâle müdde‘î-i vekîl-i mezbûr Mehmed Şükrü Ağa’ya edâsıyla mesfûrân İlya ve Küçük Serkiz zimmîler ilzâm olundukları İstanbul Mahkemesi’nden huzûr-ı [âlîlerine i‘lâm olundu] Fî 13 [Re]ceb sene 1258