İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 439 Hüküm no: 382 Orijinal metin no: [144-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahibinin izni olmadan satılan cariyenin iadesiyle fazla talep edilen paradan vazgeçilmesi 1365 [guru]ş hüküm [Ma‘rûz] Sâhibe-i arzuhâl mu‘arrefetü’z-zât Şerife Müsebbiha Hatun bt. es-Seyyid Ahmed Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûrü’l-ism İranlı Abdullah Ağa b. el-Hâc Hasan muvâcehesinde mezbûr Abdullah Ağa bin iki yüz elli altı senesi şehr-i Rebî‘ülâhirinin on beşinci günü ma‘lûmetü’l-evsâf bir re’s Çerkes câriyeyi kendi mâlı olmak üzere beş bin guruşa bana bey‘ ve teslîm ben dahi ba‘de’l-iştirâ ve’l-kabz semen-i mezkûrun iki bin guruşunu gāib ani’l-meclis Esirci el-Hâc Ali Efendi b. el-Hâc Süleyman yediyle mezbûr Abdullah Ağa’ya def‘ ü teslîm edip câriye-i mezkûre yedimde iken sene-i sâbıkā yani bin iki yüz elli yedi senesi Muharremi’l-harâmının on beşinci günü hâcegân-ı Dîvân-ı hümâyûn’dan gāib ani’l-meclis Mehmed Sadık Beyefendi b. Eyüb b. Abdullah câriye-i mezkûre yedimde rıkka münkāde mâlım iken mezbûr Abdullah Ağa bir takrîb ahz ve sana fuzûlî bey‘ ve teslîm etmemle bey‘-i mezkûru mücîz olmamış idim deyü vekîl-i sâbitü’l-vekâlesi gāibetü ani’l-meclis Emine Hatun bt. Abdullah vekâletiyle İstanbul kādısı bulunan sudûr-ı i‘zâmdan Reşid Beyzâde sa‘âdetlü fazîletlü Mehmed Beyefendi hazretleri huzûrunda mezbûr Abdullah Ağa dahi hâzır olduğu hâlde câriye-i mezkûreyi benden taleb ve da‘vâ ettikde ben mezbûr Abdullah Ağa dahi fi’l-hakīka câriye-i mezkûre mûmâ-ileyh Mehmed Sadık Beyefendi’nin mâlı olup mezbûr Abdullah Ağa bana fuzûlî bey‘ ve teslîm eylediğini ikrâr ü i‘tirâf etmemizle mûcebince ba‘de’l-hükm mûmâ-ileyh Mehmed Sadık Beyefendi câriye-i mezkûreyi bâ-i‘lâm-ı şer‘î yedimden ahz u kabz etmiş idi el-hâletü hâzihî ben dahi semen-i mezkûrdan kendine medfû‘um olan merkūm iki bin guruşu bi’l-mürâca‘a mezbûr Abdullah Ağa’dan hâlâ taleb ederim deyü da‘vâ ettikde ol dahi cevâbında câriye-i mezkûre gāib-i mûmâ-ileyh Mehmed Sadık Beyefendi’nin mâlı iken ber-vech-i muharrer fuzûlî ol-mikdâr guruşa müdde‘iye-i mezbûre Şerife Müsebbiha Hatun’a bey‘ ve teslîm ve semen-i mezkûrun ancak bin üç yüz altmış beş guruşu gāib-i mezbûr el-Hâc Ali Efendi yediyle müdde‘iye-i mezbûreden kabz ve ba‘dehû câriye-i mezkûreyi gāib-i mûmâ-ileyh Mehmed Sadık Beyefendi minvâl-i meşrûh üzere bi’d-da‘vâ ve’l-ikrâr ve’l-hükm müdde‘iye-i mezbûreden ahz üu kabz eylediğini ikrâr ü i‘tirâf ve müdde‘iye-i mezbûrenin ziyâde altı yüz otuz beş guruş müdde‘âsını inkâr etmekle müdde‘iye-i mezbûre ber-vech-i muharrer ziyâde müdde‘âsını şâhidim yokdur deyü isbâtdan izhâr-ı acz ve istihlâf ettikde mezbûr Abdullah Ağa bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre ber-vech-i muharrer ziyâde müdde‘âsıyla mezbûr Abdullah Ağa’ya bilâ-beyyine mu‘ârazadan ba‘de’l-men‘ sâlifü’l-beyân mezbûr Abdullah Ağa’nın mukırr u mu‘terif olduğu ancak bin üç yüz altmış beş guruşu müdde‘iye-i mezbûre Şerife Mesiha Hatun’a def‘ ü teslîme mezbûr Abdullah Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 10 [Re]ceb sene 11258 [1258]