İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 440 Hüküm no: 383 Orijinal metin no: [144-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Ağa’nın, sahibi olduğu kasap gediği hissesini Kasaplar Müdürü Mehmed Ali Bey’e sattığı Kasab Ma‘rûz Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’[da] Dedeler fırını kurbünde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hissesine bâ-temessük-i mütevellî bi’l-icâreteyn mutasarrıf olan el-Hâc Mehmed Sadık Ağa b. Mehmed Ragıb meclis-i şer‘-i münîrde hâlâ kassâbân müdîri bâ‘isü’l-i‘lâm es-Seyyid Mehmed Ali Bey b. es-Seyyid Osman muvâcehesinde mazbûtü’l-esâmî kasab ustaları hâzır oldukları hâlde takrîr-i kelâm edip ben ber-minvâl-i muharrer mutasarrıf olduğum nısf hisse-i gedik-i merkūmu hüsn-i rızâ ve tayyib-i hâtırım ve ferâğ-ı mu‘teber-i kat‘î ile mûmâ-ileyh es-Seyyid Mehmed Ali Bey’e bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini ustalarıyla mâ‘an tamamen almağa ta‘ahhüd edip fî-mâ ba‘d gedik-i mezkûrun nısf hisse-i merkūmesi mûmâ-ileyh es-Seyyid Mehmed Ali Bey’in hakk-ı müfevvezi olup benim aslâ ve kat‘a alâka [145] ve medhalim kalmamışdır deyü ba‘de’l-ikrâr ve’t-tasdîk âlât-ı gedik-i merkūmun nısf hisse-i mezkûresi fâriğ-i mezbûr el-Hâc Mehmed Sadık Ağa’nın ferâğından defter-i vakf-ı şerîfde mûmâ-ileyh es-Seyyid Mehmed Ali Bey uhdesine kayd ve der-dest olan temessük-i mezkûr hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 12 B sene [1]258