İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 443 Hüküm no: 385 Orijinal metin no: [146-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber esnafının, Berber Ispartalı Hasan Ağa’nın berberlikten ihraç edilmesi taleplerini tehir ettikleri Berber esnâfının şikâyetlerini tehîr [Ma‘rûz] Ashâb-ı arzuhâl Âsitâne-i aliyye’de vâki‘ berber esnâfının Kethudâsı İsmail Ağa ve Şeyhi es-Seyyid Ömer Efendi ve Du‘âcısı el-Hâc İbrahim Ağa ve Yiğitbaşısı es-Seyyid Mehmed Emin ve Çavuşu es-Seyyid Mehmed Şakir ve Samatya Köşe Ustası Mehmed Emin Ağa ve Langa Köşe Ustası Halil Ağa ve Ebu’l-feth Sultan Mehmed Han Köşe Ustası el-Hâc İsmail Ağa ve Topkapı Köşe Ustası Mehmed Ağa ve Ayasofya-i Kebîr Köşe Ustası diğer Mehmed Emin Ağa ve Tahtakale Köşe Ustası el-Hâc Hasan Ağa ve Kapan-ı dakīk köşe ustası diğer Mehmed Ağa ve Balat Köşe Ustası Hasan Ağa ve medîne-i Ebâ Eyyûbe’l-Ensârî Köşe Ustası Hasan Ağa ve kasaba-i Hasköy Köşe Ustası Abdullah Ağa ve esnâf-ı mezkûrenin ehl-i İslâm ustalarından el-Hâc Mehmed Ağa ve Mustafa Ağa ve diğer Hasan Ağa ve âhar Mehmed Ağa ve Mehmed Eşref Ağa ve Ali Ağa ve Hüseyin Ağa ve diğer Ali Ağa ve el-Hâc Ahmed Ağa ve Mehmed Tâhir Ağa ve Osman Ağa ve diğer Mustafa Ağa ve âhar Mustafa Ağa ve Mehmed Ağa ve diğer Hüseyin Ağa ve İbrahim Ağa ve İsmail Ağa ve Yusuf Ağa ve Mehmed Aziz Ağa ve Mehmed Ali Ağa ve Ahmed Necib Ağa ve Mehmed Şakir Ağa ve Ömer Ağa ve re‘âyâ ustalarından Ermeni tâifesi Başkabzımâlı Aleksan ve Balat kabzımâlı Artin ve Kumkapı kabzımâlı Asvador ve Karaman kabzımâlı Kigork ve Kapan-ı dakīk kabzımâlı diğer Kigork ve Samatya kabzımâlı Avanis ve Hasköy kabzımâlı Manuk ve Rum tâifesi Başkabzımâlı Aci Yani ve Simyon ve Kostandi zimmîler ile sâir mazbûtü’l-esâmî <> Müslim ve zimmî ustalardan her biri meclis-i şer‘-i münîrde derûn-ı arzuhâlde mezkûrü’l-ism Ispartalı Hasan Ağa b. Ali muvâcehesinde mezbûr Hasan Ağa esnâfımızdan olarak İstanbul’da Kalpakçılarbaşı civârında Yolgeçen Han’ı yanında berber olup lâkin ırzıyla mukayyed ve kisbiyle meşgūl olmamağla dâimâ her birimizin dükkânlarımıza ve lonca ta‘bîr olunur mahallemize [mahallerimize] gelip üzerine lâzım olmayan esnâf ve kethudâ umûruna karışıp umûr-ı esnâfda cümleye muhâlefet ve esnâfımız içinde türlü türlü fesâd peydâ ve esnâfı birbirilerine gamz ve nifâk ilkā etmekle biribirine düşürüp nizâ‘ ve mücâdele ve ifk ü iftirâ ile tekdîr ettirip ol-vechile esnâfımızın harâb olup perîşân-ı hâl olmasına ve nizâm-ı intizâmımızın ihtilâline sebeb olacak hâlâta cüret eylediğinden emn ü rahatımız külliyen meslûb olmuşdur deyü mezbûr Hasan Ağa’dan iştikâ ve esnâfdan ihrâc olunmasını iltimâs ve istid‘â ettiklerinden mezbûr Hasan Ağa dahi fî-mâ ba‘d esnâf-ı mezkûreden birinin dükkânlarına ve semt ü havâlîlerine ve bilâ-mûcib lonca ta‘bîr olunur mahallerine varmayıp ve uğramayıp ancak kendi ırzıyla mukayyed ve kisbiyle meşgūl olmak üzere meclis-i şer‘de müte‘ahhid ve eğer hilâf-ı ahd hareket eder ise cezâ kānûnnâme-i hümâyûnu ahkâm-ı ma‘delet-ittisâmına nazaran iktizâ eden tedîbe râzı oldukda esnâf-ı mezkûre dahi ta‘ahhüdünü kabûl ve şikâyetlerini [147] tehîr eyledikleri İstanbul Mahkemesi’nden huzûr-ı âlîlerine i‘lâm olundu bâkī emr ü fermân hazret-i men-lehü’l-emr. Fî 16 [Re]ceb sene 1258