İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 445 Hüküm no: 386 Orijinal metin no: [147-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Avakim’in alacak davasıyla Yahudi Davit’e açtığı davada sulh oldukları 12000 [guru]şa sulh [Ma‘rûz] Medîne-i Ebâ Eyyûbe’l-Ensârî’de Çömlekçiler civârında Akarçeşme nâm mahâlde ekmekçi olan derûn-ı arzuhâlde ismi mastûr Avakim v. Aznavur zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde İstanbul’da Eğrikapı dâhilinde Molla Aşkī mahallesinde bakkāl olup arzuhâl eden Davit v. Mordehay Yahûdî muvâcehesinde mersûm Davit Yahûdînin sene-i sâbıkā Muharremi’l-harâmı gurresinden işbu sene-i mübâreke Muharremi’l-harâmı gāyetine gelince mâlımdan ve yedimden iştirâ ve kabz eylediği nân-ı azîz semeninin hesâbını gāyet-i şehr-i merkūmda Yahûdî-i mersûm ile yegân yegân sehv ü galatdan ârî hesâb-ı sahîh ile rü’yet eylediğimizde lede’l-muhâsebe gayrı ez-teslîmât sahhe’l-bâkī cihet-i mezkûreden zimmetinde on altı bin dokuz yüz altmış üç guruş alacak hakkım zuhûr ettikde mersûm Davit Yahûdî meblağ-ı merkūm on altı bin dokuz yüz altmış üç guruş cihet-i mezkûreden zimmetinde bana deyni olduğunu ikrâr-ı kat‘î ile ikrâr dahi ettikden sonra yedimde olup sene-i mübâreke-i merkūme Saferi’l-hayrı gurresi târihiyle müverrah İstanbul Mahkemesi’nden verilen işbu bir kıt‘a i‘lâm-ı şer‘î mantûkunca meblağ-ı merkūm on altı bin dokuz yüz altmış üç guruşun dokuz yüz altmış üç guruşunu gurre-i mezkûrede bana edâ ve teslîm etmekle mâ‘adâsı olan on altı bin guruşun târih-i i‘lâm-ı mezkûrdan beş gün mürûrunda dört bin guruşunu ve beş gün mürûrundan sonra her yirmi bir gün hitâmında dörder bin guruşdan altmış üç günde on iki bin guruş vermekle cem‘an altmış sekiz gün müddetde deyn-i mezkûrunu tamamen bana edâ ve teslîm etmek üzere mersûm Davit Yahûdîyi tecîl ve taksît eylediğimde ol dahi kabûl ve minvâl-i meşrûh üzere edâ-i deyne ta‘ahhüd ettikden sonra meblağ-ı mukāssat-ı merkūm on altı bin guruşdan henüz bana nesne vermeksizin sâlifü’l-beyân Saferi’l-hayrın yirmi üçüncü günü meblağ-ı mezkûr on altı bin guruş ve hâric ez i‘lâm sâlifü’l-beyân sene-i sâbıkā Muharremi’l-harâmı gurresinden mukaddem bir müddet kezâlik mâlımdan ve yedimden iştirâ ve kabz eylediği nân-ı azîz semeninden gayrı ez-teslîmât sahhe’l-bâkī alacağımız kalan iki bin guruş ki cem‘an on sekiz bin guruş zimmetinde bana deyni olduğunu Yahûdî-i mersûm ikrâr ve beher mâh beş yüz guruş edâ etmek üzere ta‘ahhüd ve ber-vech-i meşrûh ikrârını müştemil târih-i merkūm ile müverrah işbu bir kıt‘a deyn tahvîlini dahi yedime verdikden sonra meblağ-ı mecmû‘-ı merkūmun ancak bin beş yüz guruşunu bana edâ etmekle bâkīsi olan on altı bin beş yüz guruşdan bana bir akçe ve bir habbe edâ etmeyip ve ecel-i mezkûr dahi hulûl etmekle meblağ-ı bâkī-i merkūm on altı bin beş yüz guruşu mersûm Davit Yahûdîden hâlâ taleb ederim deyü mazmûnları takrîrime mutâbık bir kıt‘a i‘lâm-ı şer‘î ve bir kıt‘a deyn tahvîli ibrâzıyla da‘vâ eylediğimde ol dahi cevâbında mazmûn-ı i‘lâm-ı mezkûru ve ber-vech-i muharrer ikrâr-ı deyn edip tahvîl-i mezkûru verdiğini ikrâr edip lâkin sen meblağ-ı mecmû‘-ı mezkûr on sekiz bin guruşdan kabzını mu‘terif olduğun meblağ-ı merkūm bin beş yüz guruşdan mâ‘adâ mârrü’z-zikr Saferi’l-hayr’ın yirmi üçüncü günü ikrâr-ı deyn edip tahvîl-i mezkûru verdiğimin akabinde on dört bin beş yüz guruşunu sana edâ ve teslîm etmemle mâ‘adâ ancak iki bin guruş deynim bâkī kalmışdır deyü huzûr-ı mezkûrda beni def‘e tasaddî ben dahi def‘-i mezkûrunu inkâr edip ol-vechile beynimizde ba‘de vukū‘ı’l-münâza‘a el-hâletü hâzihî bâ-tavassut-ı muslihîn beynimiz ıslâh ve tanzîm olunup ben ber-vech-i muharrer tasaddî eylediğim da‘vâmdan mersûm Davit Yahûdî ile kat‘an-li’n-nizâ‘ on iki bin guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ müdde‘âya ve bi’l-cümle husûs-ı mezkûra müte‘allika âmme-i da‘vâdan ben mesfûr Davit Yahûdînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi kezâlik husûs-ı mezkûra ve ber-vech-i muharrer eylediği teslîm da‘vâsına müte‘allika âmme-i da‘vâdan benim zimmetimi ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr on iki bin guruş zimmetimde müdde‘î-i mersûma sahîhan deyni olduğunu mersûm Davit Yahûdî tâyi‘an ve kat‘iyyen ikrâr ü i‘tirâf ve bi’t-taleb müdde‘î-i mersûm Avakim zimmîye edâsıyla mersûm Davit Yahûdî ilzâm olunduğu İstanbul Mahkemesi’nden huzûr-ı âlîlerine i‘lâm olundu bâkī emr ü fermân hazret-i men-lehü’l-emr. Fî 17 [Re]ceb sene 1258