İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 446 Hüküm no: 387 Orijinal metin no: [147-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Humbaracı Serhalifesi İbrahim Ağa’nın vârislerinden Zeliha’nın terekeden olan ev hissesini ödemesi talebiyle Debbâğ Hasan Ağa’ya açtığı davadan vazgeçtiği Menzil nizâ‘ı [Ma‘rûz] Derûn-ı arzuhâlde mezkûrü’l-ism olup medîne-i hazret-i Ebâ Eyyûbe’l-Ensârî’de Kiremitçi Süleyman Çelebi mahallesi ahâlisinden iken bin iki yüz kırk iki senesi hilâlinde Mora cânibinde fevt olan Humbaracı ser-halîfelerinden İbrahim Ağa b. Osman’ın verâseti zevce-i menkûha-i [148] metrûkesi Şerife Hatice Hatun bt. İbrahim ile sulbiye sagīre kızı Şerife Emine ve ol târihde sagīre ve hâlâ kebîre ve bikr sulbiye kızı Şerife Zeliha Hanım’a münhasıra ba‘dehû sagīre-i mezbûre Şerife Emine dahi fevt olup verâseti vâlidesi mezbûre Şerife Hatice Hatun ile li-ebeveyn kız karındaşı mezbûre Şerife Zeliha Hanım’a ba‘de’l-inhisâr sâhibe-i arzuhâl mezbûre Şerife Zeliha Hanım’ın li-ebin hâli ve tarafından husûs-ı âti’l-beyânda vekîl olduğu zâtını ârifân Anadolu kalemi muhzırânından Mehmed Salih Ağa b. İbrahim ve el-Hâc Mustafa Ağa b. Ahmed nâm kimesne şehâdetleriyle ber-nehc-i şer‘î sâbit olan Anadolu kuzâtından es-Seyyid Mehmed Said Efendi b. el-mezbûr İbrahim bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde meclis-i şer‘-i münîrde mezbûre Şerife Hatice Hatun’un li-ümmin kız karındaşı Şerife Nefîse Hatun bt. es-Seyyid Mustafa’nın hâlâ zevci olup zikri âtî vakıf menzilin nısf hisse-i şâyi‘asına bâ-temessük-i mütevellî mutasarrıf ve vaz‘-ı yedi mütehakkık olan derûn-ı arzuhâlde mezkûrü’l-ism Debbâğ Hasan Ağa b. Hasan muvâcehesinde mahalle-i mezkûrede kâin ma‘lûmü’l-hudûd fevkānî ve tahtânî yedi bâb oda ve eşcâr-ı müsmire ve gayr-ı müsmireli bahçe ve vakıf kanavât-ı mefrûşesine teba‘iyetle bir masura mâ-i lezîz-i cârî ve müştemilât-ı sâire ve ma‘lûmeyi hâvî bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan merhûme ve mağfûrun-lehâ Emine Sultan -tâbe serâhâ- Vakf-ı şerîfleri müsakkafâtından bir bâb vakıf menzil dört sehm i‘tibârıyla bir sehm hisse-i şâyi‘ası mezbûr Hasan Ağa’nın kayınpederi mezbûr es-Seyyid Mustafa’nın bi’l-icâreteyn taht-ı tasarrufunda olup ve üç sehm hisse-i şâyi‘ası dahi müvekkilem mezbûre Şerife Zeliha Hanım ile li-ebeveyn kız karındaşı sagīre-i müteveffâ-yı mezbûre Şerife Emine’nin hayatında babaları müteveffâ-yı mezbûr İbrahim Ağa’nın intikālinden bi’l-münâsefe tasarruflarında iken sâlifü’l-beyân bin iki yüz kırk iki senesi Zilhiccetü’ş-şerîfesinin on üçüncü günü müvekkilem mezbûre ve kız karındaşı mezbûre Şerife Emine sagīreler olduklarından vasîleri ceddeleri yani vâlideleri kız karındaşı gāibetü ani’l-meclis mezbûre Şerife Hatice Hatun’un vâlidesi Fatıma Hatun bt. Ahmed selâse-i irbâ‘-ı hisse-i şâyi‘a-i menzil-i mezkûru müsevveg-i şer‘îye binâen bi’l-izni’ş-şer‘î bedel-i misli olan üç bin beş yüz guruş bedel mukābelesinde tashîh-i ferâğ ederek bâ-re’y-i mütevellî kendi tefevvüz ve bedel-i merkūm üç bin beş yüz guruşu idhâl-i defter-i kassâm ettikden sonra bin iki yüz elli bir senesi Muharremi’l-harâmının yirmi sekizinci günü mezbûre Fatıma Hatun ber-vech-i muharrer mutasarrıfe olduğu selâse-i erbâ‘-ı hisse-i şâyi‘a-i menzil-i merkūmun sülüs hisse-i şâyi‘asını uhdesinde ibkā ve mâ‘adâ sülüsân hisse-i şâyi‘asını dâmâdı mezbûr Hasan Ağa’ya bâ-re’y-i mütevellî ferâğ ve tefvîz ve mezbûr es-Seyyid Mustafa dahi bin iki yüz elli üç senesi hilâlinde vefât edip menzil-i mezkûrdan mutasarrıf olduğu rub‘ hisse-i şâyi‘a-i merkūme ancak sulbiye kebîre kızı mezbûr Hasan Ağa’nın zevcesi kezâlik gāibetü ani’l-meclis mezbûre Şerife Nefîse Hatun’a hasbe’l-âde intikāl ve mezbûre Fatıma Hatun dahi bin iki yüz elli dört senesi hilâlinde vefât edip menzil-i mezkûrdan mutasarrıfe olduğu hisse-i şâyi‘a-i bakıye-i merkūme kebîre kızları gāibân-ı mezbûretân Şerife Nefîse Hatun ve Şerife Hatice Hatun’a ale’l-iştirâki’s-seviyy âdiyen intikāl edip ol-vechile el-yevm menzil-i mezkûrun nısf hisse-i şâyi‘ası mezbûr Hasan Ağa’nın ve rub‘ ve sümün hisse-i şâyi‘aları zevcesi gāibe-i mezbûre Şerife Nefîse Hatun’un ve ancak sümün hisse-i şâyi‘ası dahi gāibe-i mezbûre Şerife Hatice Hatun’un taht-ı tasarruflarında olup ben karındaşım gāibe-i mezbûre Şerife Hatice Hatun’un ber-vech-i muharrer mutasarrıfe olduğu sümün hisse-i şâyi‘a-i menzil-i merkūmun tarafeynden bi’l-vekâle mezbûr Hasan Ağa’ya meccânen bâ-re’y-i mütevellî ferâğ ve tefvîze ta‘ahhüd etmemle sümün hisse-i şâyi‘a-i merkūmeden mâ‘adâ husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben mezbûr Hasan Ağa’nın zimmetini ibrâ-i âmm-ı sahîh-i şer‘î ile müvekkilem mezbûre Şerife Zeliha Hanım’a izâfetle bi’l-vekâle ibrâ ve iskāt eylediğimde ol dahi benim müteveffâ-yı evvel-i mezbûr İbrahim Ağa zimmetinde hayatında cihet-i karzdan bâ-tahvîl beş bin guruş alacağım olup kable’l-edâ fevt olmağla meblağ-ı merkūmu terekesinden taleb ederim deyü tasaddî eylediği da‘vâsından rızâsıyla meccânen fâriğ olup meblağ-ı mezkûra [149] ve sümün-i hisse-i şâyi‘a-i menzil-i mezkûrdan mâ‘adâ bi’l-cümle zikr olunan husûslara ve sâir cemî‘ hukūk-ı şer‘iyeye müte‘allika âmme-i da‘vâdan müteveffâ-yı evvel-i mezbûr İbrahim Ağa ile müvekkilem mezbûre Şerife Zeliha Hanım’ın zimmetlerini kezâlik ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını asâleten ve vekâleten kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 16 [Re]ceb sene 1258