İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 448 Hüküm no: 388 Orijinal metin no: [149-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaşıkçı ve tarakçı esnafının tâbi oldukları nizamnamelerinin yenilendiği Tarakçı esnâfının emr-i âlî istid‘âları [Ma‘rûz] Hâmiş-i arzuhâlde mastûr derkenâr nâtık olduğu üzere Âsitâne-i aliyye’de Sultan Bâyezid Han Câmi‘-i şerîf’i civârında vâki‘ kaşıkçı esnâfı ile Mahmudpaşa Câmi‘-i şerîf’i civârında vâki‘ tarakcı esnâfına mübâya‘ası mahsûs olan Trabzon’dan şehribânî? ta‘bîr olunur cimşir ve kaşık taslakları ve Taraklı Yenicesi’nden kızılcık ve sakız ve cimşir (şimşir) ve kara kurt ve harcî siyâh? ve hâm sakız geldikde kethudâ ve yiğitbaşı ve kaşıkçıbaşı ma‘rifetleriyle kaşıkçı ve tarakcı ustalarına her birinin hâl ve tahammüllerine göre cümlesine tevzî‘ ve taksîm ve herkes kendi san‘atına iktizâ eden nev‘iyyetini ashâbından iştirâ etmek ve içlerinden birisi kendine inhisâr dâ‘iyesiyle ibâdullâhı ızrâra bâdî olur hâlâta tasaddî eder ise tedîb olunmak üzere nizâm-ı kadîmlerini hâvî Hudâvendigâr-ı sâbık müstağrak-ı bihâr-ı rahmet-i hâlık vâlid-i kesîrü’l-mehâmid-i hazret-i şehin-şâhî mazhar-ı gufrân-ı İlâhî hazret-i Sultan Gāzi Mahmud Han -aleyhi eltâfü Rabbihi’l-Mennân- zaman-ı adâlet-unvânlarında bin iki yüz yirmi beş senesi evâil-i Zilhiccetü’ş-şerîfesi’nde zikr olunan kaşıkçı esnâfı yedlerine bir kıt‘a emr-i âlî verilmiş ve şimdi esnâf-ı merkūme ber-vech-i muharrer yedlerinde olan emr-i âlînin tecdîdini işbu arzuhâlleriyle istid‘â etmiş olduklarına ve tanzîmât-ı hayriye usûl-i ma‘delet-şumûlüne ve inhisâr-ı bey‘ ü şirâ memnû‘iyeti nizâmına nazaran ihtisâb nâzırı bendeleri ma‘rifetiyle iktizâsını bu dâ‘îleri i‘lâm etmek üzere kaleminden derkenâr olunmuş <> olduğuna binâen arzuhâl-i mezkûr bâlâsına iktizâsını i‘lâma himmet eyleyesin deyü bu dâ‘îlerine hitâben şeref-rîz-i sudûr eden fermân-ı âlîlerine imtisâlen ecille-i ricâl-i Devlet-i aliyyeden hâlâ İhtisâb Nâzırı sa‘âdetlü es-Seyyid Osman Nuri Beyefendi hâzır oldukları hâlde zikr olunan kaşıkçı ve tarakcı esnâfının hâlâ kethudâları es-Seyyid Hasan Efendi ve esnâf-ı mezkûreden Ahmed Ağa ve Mehmed Emin Ağa ve es-Seyyid Hafız Ahmed Efendi ve el-Hâc Mehmed Ağa ve el-Hâc İbrahim Edhem Ağa ve sâir mazbûtü’l-esâmî kimesneler meclis-i şer‘a celb olunup eğerçi mukaddemâ esnâflardan ba‘zılarına evâmir-i aliyye verilmiş ise de bu misillü evâmir-i şerîfenin tecdîdi bi-tevfîkihî te‘âlâ ittihâz olunan usûl-i haseneye münâfî görülmüş ve ma‘a-mâfîh esnâf-ı merkūma nizâm ve gedikleri i‘tibârının halelden vikāyesi dahi lâzım gelmiş idiğine binâen emr-i şerîf tecdîdinden sarf-ı nazar-birle İhtisâb Nezâreti tarafından îcâbı vechile esnâf-ı merkūmenin vikāye-i nizâmlarına dikkat olunmak üzere husûs-ı mezkûrun taraf-ı Nezâret-i İhtisâb’a bildirilmesi husûsu Meclis-i Âlî’de tezekkür ve tensîb olunmuş ve irâde-i seniyye-i mülûkâne ol merkezde ta‘alluk buyurulmuş olmağla mûcebince îcâbı icrâ olunmak bâbında sâdır olan fermân-ı âlî ve şeref-sunûh buyurulan irâde-i seniyye-i mülûkâne bi-ibâretihâ cerîde muhâsebesine kayd olunarak ber-mantûk-ı irâde-i seniyye îcâbı vechile esnâf-ı merkūmenin vikāye-i nizâmlarına dikkat olunmak üzere işbu sene-i mübâreke Cemâziyelevvel’inin ikinci günü târihiyle müverrah bâ-fermân-ı âlî taraf-ı Nezâret-i İhtisâb’a i‘tâ olunup nâzır-ı mûmâ-ileyhin ibrâz eyledikleri bir kıt‘a ilmühaber esnâf-ı merkūma muvâcehelerinde feth ü kırâet ve mazmûnu ve el-yevm cârî ve mer‘î olan nizâm-ı mezkûrları tatarruk-ı halelden ber-vech-i muharrer vikāye olunacağı i‘lân ve tefhîm ü işâ‘at olundukda cümlesi sem‘an ve tâ‘aten merâsimini ba‘de’l-edâ işbu irâde-i seniyye-i hazret-i mülûkâneye teşekküren muvâzabet-kâr oldukları da‘vât-ı istidâme-i ömr-i şevket-i şâhâne tekrarına ibtidâr eyledikleri İstanbul Mahkemesi’nden huzûr-ı [âlîlerine i‘lâm olundu] Fî 25 C sene 1258