İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 449 Hüküm no: 389 Orijinal metin no: [149-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudilikden vazgeçip Müslüman olan Ahmed Ağa’nın Haham Yakof ve mağazacı Sabatay’daki alacakları konusunda anlaşmaya vardığı 3000 [guru]şa sulh [Ma‘rûz] Asâkir-i hâssa-i şâhâne mirlivâlarından Mustafa Paşa teba‘asından mühtedî Ahmed Ağa b. Abdullah meclis-i şer‘-i münîrde bâ‘isiyyü’l-i‘lâm Haham Yakof v. Markado ve Mağazacı Sabatay v. Yasef [150] Yahûdîler muvâcehelerinde ben kable’l-hidâye Yahûdî iken işbu târih-i i‘lâmdan üç sene mukaddem mâlımdan mersûmân Yakof ve Sabatay Yahûdîlere îdâ‘ ve teslîm eylediğim mecmû‘u sekiz yüz on guruş kıymetli bir çift <> altın bilezik ve bir çift zümrüd küpe ve yaldızlı bir sîm kuşak ve üç elmaslıca sîm yüzük ile dört bin beş yüz guruş nakdimi bi-gayrı hakkın istihlâk etmeleriyle cümlesini mersûmân Yakof ve Sabatay Yahûdîlerden hâlâ tazmîn taleb ederim deyü tasaddî eylediğim da‘vâmdan bâ-tavassut-ı muslihîn mersûmân ile kat‘an-li’n-nizâ‘ üç bin guruş bedel-i makbûza ba‘de-akdi’l-musâlaha ve’l-kabûl ziyâde müdde‘âma ve bi’l-cümle husûs-ı mezkûra ve târih-i i‘lâm-ı merkūma gelince sâir cemî‘ hukūk-ı şer‘iyeye müte‘allika âmme-i de‘âvîden ben mesfûrân Yakof ve Sabatay Yahûdîler ile üvey anam gāibetü ani’l-meclis Efka bt. Bünyamin Yahûdîyenin zimmetlerini kabûle mukārin ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı nizâ‘ eyledik deyü ikrâr <> ve tasâdıkları tescîl ve İstanbul Mahkemesi’nden huzûr-ı âlîlerine i‘lâm olundu. Bâkī emr u fermân hazret-i men-lehü’l-emr. Fî 18 Receb sene 1258