İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 450 Hüküm no: 390 Orijinal metin no: [150-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leyla bt. Abdullah’ın Kapıcıbaşı Mahmud Bey ile validesi Hafize Nefise vasıtasıyla satın aldığı gümrük eshamı ve gelirlerinden dolayı hiçbir alacağının olmadığını beyan edip zimmet ibrası yaptığı Sehim nizâ‘ına dâir [Ma‘rûz] Sâhibe-i arzuhâl mu‘arrefetü’z-zât zenciye Fatıma nâm-ı diğer Leyla Kadın bt. Abdullah meclis-i şer‘-i enverde Rikâb-ı hümâyûn-ı şâhâne kapıcıbaşılarından derûn-ı arzuhâlde mezkûrü’l-ism es-Seyyid Mahmud Bey b. el-müteveffâ es-Seyyid Ömer Ağa ile vâlidesi Hafize Nefîse Hanım bt. Ahmed taraflarından husûs-ı âti’l-beyânda vekîlleri olduğu zât-ı mûmâ-ileyhâyı ârifân Abdüllatif Ağa b. Mustafa ve Mehmed Rüstem Ağa b. Abdullah nâm kimesneler şehâdetleriyle sâbit olan teba‘adan es-Seyyid İbrahim Ağa b. Mustafa muvâcehesinde ben müvekkilân-ı mûmâ-ileyhimâdan mûmâ-ileyh es-Seyyid Mahmud Bey’in İstanbul’da Demirkapı civârında Dâyehatun mahallesinde vâki‘ konağında şehr-i sâbık Cumâdelâhire gāyetine gelince iki buçuk sene müddet misâfireten sâkine olup ba‘dehû müfârakat etmemle mîr-i mûmâ-ileyhin mâlımdan bi-tarîki’l-emâne nakden makbûzu olan dört bin guruşun emrimle iki bin guruşunu bin iki yüz elli altı senesi Cumâdelûlâsı’nın yirmi birinci günü benim için tefevvüz eylediği İstanbul ve tevâbi‘i Duhân Gümrüğü mukāta‘ası eshâmından senevî iki yüz elli guruş fâizli bir sehmin sümün hissesi mu‘accelesine ve diğer iki bin guruşunu dahi şehr-i mezkûrun yirmi dördüncü günü kezâlik benim için tefevvüz eylediği mukāta‘a-i mezkûre eshâmından senevî ol-mikdâr guruş fâizli bir sehmin nısf <> hissesi mu‘accelesine verip ve iki kıt‘a berât ve mesârif-i sâirelerine dahi bana teberru‘an kendi mâlından harc ü sarf ve vakt-i taksîtleri hulûlünde dahi iktizâ eden fâizlerini mahâllinden emrimle ahz u kabz ve bana tamamen def‘ ü teslîm ettikden sonra el-hâletü hâzihî zikr olunan iki kıt‘a berât ile yedinde mahfûz olan mührümü dahi vekîli mezbûr es-Seyyid İbrahim Ağa yediyle meclis-i şer‘de bana teslîm etmekle gerek meblağ-ı merkūm dört bin guruşdan ve gerek ber-vech-i muharrer mutasarrıf olduğum hisse-i merkūmelerin fâizlerinden müvekkil-i mîr-i mûmâ-ileyh yed ve zimmetinde aslâ ve kat‘a hakkım ve alacağım kalmamağla bi’l-cümle husûs-ı mezkûra ve medîne-i Üsküdar’da Atpazarı civârında Tabutcular içinde vâki‘ mukaddemâ takyeci dükkânı ve hâlâ kadayıfcı mağazasına ve ecr-i misl da‘vâsına ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben müvekkilân-ı mûmâ-ileyhimâ es-Seyyid Mahmud Bey ve vâlidesi Hafize Nefîse Hanım’ın zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde vekîl-i mezbûr es-Seyyid İbrahim Ağa dahi zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden kezâlik benim zimmetimi ibrâ-yı âm ile müvekkilleri mûmâ-ileyhimâya izâfetle bi’l-vekâle ibrâ ve iskāt ve tarafeynden her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 20 min-Receb sene 1258