İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 451 Hüküm no: 391 Orijinal metin no: [150-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail Efendi’nin vakıf evdeki hissesini Pirinççi Ömer Ağa’ya sattığı Menzil ferâğı [Ma‘rûz] İstanbul’da Ebu’l-feth Sultan Mehmed Han -aleyhi’r-rahmetü ve’l-gufrân- Câmi‘-i şerîfi civârında Kirmasti mahallesi ahâlisinden ve müderrisîn-i kirâmdan olup mahrûse-i Bursa’da misâfir iken bundan akdem vefât eden es-Seyyid Hafız İsmail Efendi b. Osman’ın sulbî kebîr oğlu derûn-ı arzuhâlde mezkûrü’l-ism es-Seyyid Mehmed bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen Çarşamba günü huzûr-ı hazret-i Fetvâ-penâhî’de ve ba‘dehû şifâhen sâdır olan fermân-ı âlîlerine imtisâlen bâb-ı cenâb-ı müşârün-ileyhimde İstanbul kādıları dâ‘îlerine tahsîs buyurulan dâirede müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde akd olunan meclis-i şer‘-i münîrde sâhib-i arzuhâl Pirinççi el-Hâc Ömer Ağa b. Mehmed muvâcehesinde Haremeyn-i Muhteremeyn Vakfı müsakkafâtından mahalle-i mezkûrede kâin ma‘lûmü’l-hudûd bir bâb vakıf menzilin selâse-i irbâ‘-ı hisse-i şâyi‘ası bâ-temessük-i mütevellî bi’l-icâreteyn mezbûr el-Hâc Ömer Ağa’nın ve rub‘ hisse-i şâyi‘ası dahi pederim müteveffâ-yı mûmâ-ileyh es-Seyyid Hafız İsmail Efendi’nin intikālinden bâ-temessük-i mütevellî benim taht-ı tasarrufumuzda olmağla ben ber-vech-i muharrer mutasarrıf olduğum rub‘ hisse-i şâyi‘a-i menzil-i merkūmu hüsn-i rızâ ve tayyib-i hâtırım ile mezbûr el-Hâc Ömer Ağa’ya iki bin guruş bedel mukābelesinde bâ-re’y-i mütevellî ve ferâğ-ı kat‘î ile ferâğ ve tefvîz eylediğimde ol dahi ber-vech-i muharrer tefevvüz ve kabûl ve bedel-i merkūm iki bin guruşu bana def‘ ü teslîme ta‘ahhüd etmekle bedel-i mezkûrdan mâ‘adâ bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 21 [Re]ceb sene 1258