İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 452 Hüküm no: 392 Orijinal metin no: [151-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celepler ile kasapların Anadolu’dan İstanbul’a getirilen koyunların et ve sakatatlarının belirlenen narh üzerinden satışını yapmak üzere anlaştıkları Fiât-ı ganem Ma‘rûz Âsitâne-i aliyye -sânehallâhu te‘âlâ ani’l-âfât ve’l-beliyye- sekenesinin tevsî-‘i akvât-ı yevmiyeleri’çün Anadolu’da Alişanbey Aşîreti’nden Karaman ağnâmı sevk eden celeb tâifesinden olup üç yüz ganem sevk eden Osman Efendi b. Yusuf ve dört yüz ganem sevk eden el-Hâc Musa b. Hasan ve altı yüz ganem sevk eden İbrahim b. Kasım nâm kimesnelerden her biri asâleten ve kezâlik altı yüz ganem sevk eden Güleşoğlu Hüseyin b. Mahmud ve üç yüz ganem sevk eden Ahmed b. Hüseyin ve beş yüz ganem sevk eden Kasımoğlu Osman Ağa ve yedi yüz re’s ganem sevk eden Musa b. Süleyman ve kezâlik yedi yüz re’s ganem sevk eden Hüseyin b. Ali ve iki yüz re’s ganem sevk eden Ali b. el-Hâc Ahmed ve kezâlik iki yüz re’s ganem sevk eden Topaloğlu Abdullah ve kezâlik iki yüz <> re’s ganem sevk eden Sarı Haliloğlu Abdullah nâm kimesneler taraflarından husûs-ı âtîde vekîlleri olan Celebbaşı Kara İbrahim Ağa b. Abdullah nâm kimesne dahi vekâleten ecille-i ricâl-i Devlet-i aliyyeden hâlâ Nâzır-ı İhtisâb-ı İstanbul atûfetlü es-Seyyid Osman Nuri Beyefendi <> ve hâlâ Ağnâm müdîri mütehayyizân-ı Hâcegân-ı Dîvân-ı Hümâyûn’dan izzetlü el-Hâc Hüseyin Hüsam Efendi hâzır oldukları hâlde meclis-i şer‘-i münîrde Yedikule ve Eğrikapı Kasablar Kethudâsı es-Seyyid Mehmed Ali Bey mevcûd olarak ustalarından Mehmed Ağa ve Ali Ağa ve diğer Mehmed Ağa ve el-Hâc Mahmud Ağa ve el-Hâc İsmail Ağa ve Ömer Ağa ve el-Hâc Hüseyin Ağa ve sâir mazbûtü’l-esâmî kimesneler hâzır oldukları hâlde bizim ve müvekkilûn-ı mezbûrûnun aşîretlerinden ve mahâll-i sâireden bâlâda bast ü beyân olunduğu üzere sevk u tesyîr eylediğimiz cem‘an dört bin yedi yüz re’s ağnâmın beher kıyyesini seksen üçer paraya ve kuyruğunun beher kıyyesini yüz altmışar paraya ve sakatlarını yetmiş beşer paraya kassâbâna vermeye onlar dahi ba‘de’l-kabûl lahmının fiyât-ı mukarreresi olan seksen üç para üzerine dörder para ticâret zammıyla seksen yedi paraya ve kuyruğunun kezâlik fiyât-ı maktû‘ası olan yüz altmış para üzerine on beş para ticâret zammıyla yüz yetmiş beş paraya kanadârlarına onlar dahi üçer para zammıyla lahmın beher kıyyesini doksanar paraya ve beşer para zammıyla kuyruğun beher kıyyesini yüz seksener paraya ibâdullâha bey‘ ve hamîs ve Cuma günleri ta‘tîl eyleyerek haftada beş gün tevzî‘a ve yevm-i tevzî‘inden otuz bir gün tamamında mikdâr ve fiyâtlarını mübeyyin yaftalarımızı vermeye kethudâ-yı merkūm ve altmış bir gün tamamında iktizâ eden esmânını edâya esnâf-ı hâzırûn-ı mezbûrûn ta‘ahhüd eylediler deyü ba‘de’l-ikrâr ve’t-tesâdık husûs-ı mezkûre minvâl-i meşrûh üzere bi’l-istîzân kat‘-ı fiyât olunmağla esnâf-ı hâzırûn-ı mezbûrûn aldıkları koyunları narh-ı mezkûrdan ziyâdeye kanadârlarına bey‘ ettirmemek üzere kendilerine tenbîh olunup onlar dahi vech-i meşrûh üzere ta‘ahhüd ettiklerinden mâ‘adâ eğer ziyâde bey‘ ederi zuhûr eder ise kanadârlarıyla mâ‘an kendilerinin tedîb olunmalarına dahi râzı oldukları İstanbul Mahkemesi’nden huzûr-ı [âlîlerine i‘lâm olundu] Fî 13 [Re]ceb sene [1]1258 [1258]