İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 453 Hüküm no: 393 Orijinal metin no: [151-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoli bt. Nikola’nın kendisine ait evi zapt ettikleri iddiasıyla Erani bt. Vartan’ın vârislerine açtığı davada haklı bulunarak evin kendisine iadesine karar verildiği Fener kapısında dört bâb oda nizâ‘ı [Ma‘rûz] Derûn-ı arzuhâlde ismi mastûr şahsı mu‘arrefe Zoli bt. Nikola Nasrâniye bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde bi’d-defa‘ât Çarşamba günleri huzûr-ı hazret-i Fetvâ-penâhî’de ma‘kūd meclis-i şer‘-i hatîrde bin iki yüz elli altı senesi hilâlinde hâlike olan Erani bt. Vartan v. Atam Nasrâniyenin sadriye kebîre kızları olup zikri âtî vakıf menzile vaz‘-ı yedleri mütehakkık olan arzuhâl sâhibeleri Drohi ve Zümrüt ve Gevher ve Penbe benât-ı Mardıros v. Serkiz Nasrâniyeler taraflarından husûs-ı câi’l-beyânda vekîlleri olduğu eşhâs-ı mersûmâtı bilirler Dimitri v. Nikola ve Serkiz v. Avanis nâm zimmîler şehâdetleriyle ber-nehc-i şer‘î sâbit olan Üsküdarlı Terzi Artin v. Bogos zimmî muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Müteferrika Yakub Ağa Vakfı müsakkafâtından bâ-temessük-i mütevellî bi’l-icâreteyn mutasarrıfe olduğum İstanbul’da Fener kapısı dâhilinde Tahtaminâre kurbünde Abdi Subaşı mahallesinde kâin ma‘lûmü’l-hudûd dört bâb oda ve müştemilât-ı sâire-i ma‘lûmeyi muhtevî bir bâb vakıf menzili bin iki yüz kırk altı senesi Saferi’l-hayrının on yedinci günü müvekkilât-ı mersûmât Drohi ve Zümrüt ve Gevher ve Penbe Nasrâniyelerin anaları hâlike-i mersûme Erani bt. Vartan v. Atam Nasrâniyeye sağlığında cihet-i karzdan iki bin guruş deynim mukābelesinde vefâen bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl edip hattâ mersûme Erani Nasrâniye sıhhatinde ferâğ-ı mezkûr ber-vech-i muharrer vefâen olduğunu kirâren ve mirâren ikrâr dahi etmekle meblağ-ı mezkûr iki bin guruşu istifâ birle menzil-i merkūmu bana bâ-re’y-i mütevellî redd ü ferâğ etmeksizin mersûme Erani Nasrâniye hâlike olup menzil-i mezkûru kızları müvekkilât-ı mersûmât zabt ve vaz‘-ı yed etmeleriyle ben deyn-i merkūm iki bin guruşu sene-i sâbıkāda duhûl eden Mayıs’ın on sekizinci günü müvekkilât-ı mersûmâta tamamen [152] edâ ve teslîm eylediğimden el-hâletü hâzihî menzil-i mezkûru bâ-re’y-i mütevellî alıp tasarruf murâd eylediğimde müvekkilât-ı mesfûrât Drohi ve Zümrüt ve Gevher ve Penbe Nasrâniyeler bi-gayrı hakkın mümâna‘at ederler suâl olunup ber-vech-i muharrer mümâna‘atları men‘ ü def‘ olunmak matlûbumdur deyü vakf-ı mezkûrun bi’l-meşrûta hâlâ mütevellîsi es-Seyyid Abdülhalim Efendi b. İsmail hâzır olduğu hâlde da‘vâ ettikde vekîl-i mersûm Artin zimmî dahi cevâbında müdde‘iye-i mersûme Zoli Nasrâniye ber-vech-i muharrer mutasarrıfe olduğu menzil-i mezkûru târih-i merkūmede hâlike-i mersûme Erani Nasrâniyeye sağlığında ol-mikdâr guruş mukābelesinde ferâğ-ı kat‘î ve re’y-i mütevellî ile ferâğ ve tefvîz ol dahi tefevvüz ve kabûl edip ol-vechile menzil-i mezkûra mersûme Erani Nasrâniye ile’l-helâk mutasarrıfe iken hâlike oldukda kızları müvekkilelerim mersûmât Drohi ve Zümrüt ve Gevher ve Penbe Nasrâniyelere irbâ‘an intikāl eylediğine binâen kızları müvekkilelerim mersûmât zabt ve vaz‘-ı yed ederler ve müdde‘iye-i mersûme Zoli Nasrâniye zimmetinde dahi bir marpiç şal semeninden iki bin guruş alacak hakları olmağla müdde‘iye-i mersûme teslîmini iddi‘â eylediği meblağ-ı merkūm iki bin guruşu müvekkilelerim mersûmâta şal semeninden deyn-i mezbûr iki bin guruş için vermiş idim deyip ferâğ-ı mezkûrun vefâen olduğunu ve hâlike-i mersûmenin vech-i muharrer üzere ikrârını bi’l-vekâle inkâr etmekle müdde‘iye-i mersûme hâlike-i mersûme Erani Nasrâniyenin ikrâr-ı meşrûhunu her biri mahallerinden lede’t-tezkiye makbûlü’ş-şehâde idikleri ihbâr olunan mahalle-i mezkûre civârında Kiremit mahallesi mütemekkinlerinden Terzi Nikola v. Tanaş ve Havâss-ı Refî‘a kazâsına muzâfe kasaba-i Hasköy’de Kalaycı Bahçesi nâm mahâl mütemekkinlerinden Terzi Yasef v. Uğurlu nâm zimmîler şehâdetleriyle huzûr-ı hazret-i müşârün-ileyhde vekîl-i mersûm Artin zimmî muvâcehesinde vech-i vecîh-i şer‘î üzere isbât edip ve vekîl-i mersûm dahi bi’d-da‘vâ inkâra mukārin eylediği def‘ü’d-def‘ini lede’l-istimhâl ve’l-imhâl kirâren ve mirâren müddet-i mehl-i şer‘î mürûr edip bir vechile isbâta kādir olamayıp tahlîfe dahi tâlib olmamağla mûcebiyle def‘-i mezkûruyla müdde‘iye-i mersûmeye bilâ-beyyine mu‘ârazadan ba‘de’l-men‘ menzil-i mezkûrdan müvekkilât-ı mersûmât Drohi ve Zümrüt ve Penbe ve Gevher Nasrâniyeler keff-i yed edip bâ-re’y-i mütevellî müdde‘iye-i mersûme Zoli Nasrâniyenin zabt ü tasarrufu iktizâ eylediği İstanbul Mahkemesi’nden huzûr-ı âlîlerine i‘lâm [olundu] Fî 17 Receb sene 1258