İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 455 Hüküm no: 394 Orijinal metin no: [152-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miskyağcı Hasan Efendi’nin vârislerinden Nazende Hanım’ın kendisine ait vakıf bir evin yarı hissesini zapt ettiği iddiasıyla vârislerden Emine Hatun’a açtığı davada haksız bulunduğu Bir bâb menzil nizâ‘ı [Ma‘rûz] İstanbul’da Küçükayasofya civârında Hüseyinağa mahallesinde sâkin iken bin iki yüz elli iki senesi Şa‘bâni’l-mu‘azzamı’nın yirmi üçüncü günü fevt olan Miskyağcı Hasan Efendi b. Abdullah’ın verâseti zevce-i menkûha-i metrûkesi Şerife Emine Hatun bt. es-Seyyid İbrahim ile zevce-i mezbûreden mütevellidler sulbî sagīr oğulları es-Seyyid Süleyman Necib ve es-Seyyid Salih ve sulbiye sagīre kızı Şerife Âişetü’s-sıddîka ve ümm-i veledey Nazende Kadın bt. Abdullah’dan mütevellide ve ol târihde sagīre olup işbu sene-i mübâreke şehr-i Rebî‘ülevvelinin on beşinci günü bâ-hüccet-i şer‘iye rüşdü sâbit olan sulbiye kebîre kızı Fatıma Hanım’a münhasıra ba‘dehû <> sagīr-i mezbûr es-Seyyid Süleyman Necib dahi fevt olup verâseti vâlidesi mezbûre Şerife Emine Hatun ile li-ebeveyn er ve kız karındaşları sagīrân-ı mezbûrân es-Seyyid Mehmed Salih ve Şerife Âişetü’s-sıddîka’ya münhasıra ba‘dehû sagīr-i mezbûr es-Seyyid Mehmed Salih dahi fevt olup verâseti vâlidesi mezbûre Şerife Emine Hatun ile li-ebeveyn kız karındaşı sagīre-i mezbûre Şerife Âişetü’s-sıddîka ve li-ebin kız karındaşı mezbûre Fatıma Hanım’a ba‘de’l-inhisâr sâhibe-i arzuhâl mu‘arrefetü’z-zât mezbûre Nazende Kadın kızı kezâlik mu‘arrefetü’z-zât mezbûre Fatıma Hanım hâzıra olduğu hâlde bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî vakıf menzilin nısf hisse-i şâyi‘asına vaz‘-ı yedi mütehakkık olan derûn-ı arzuhâlde mezkûretü’l-ism kezâlik zâtı mu‘arrefe mezbûre Şerife Emine Hatun muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Mustafa Paşa b. el-merhûm Abdurrahman Paşa Vakfı’nın bi’l-meşrûta hâlâ mütevelliyesi Fatıma Hanım Tarafından mürsel vekîl-i şer‘îsi câbî-i vakf Hafız Hüseyin Efendi b. Hasan ve sagīre-i mezbûre Şerife Âişetü’s-sıddîka ile hâzıra-i mezbûre Fatıma Hanım’ın hâl-i sıgārında tesviye-i umûrlarına vasîyy-i muhtârları Osman Efendi b. Abdullah hâzır oldukları hâlde vakf-ı mezkûr müsakkafâtından mahalle-i mezkûrede kâin ma‘lûmü’l-hudûd şehriye altmış akçe icâre-i müecceleli bir bâb vakıf menzil müteveffâ-yı evvel-i mezbûr Hasan Efendi’nin intikālinden oğulları müteveffiyân-ı sagīrân-ı mezbûrân es-Seyyid Süleyman Necib ve es-Seyyid Mehmed Salih’in hayatlarında ve kızı hâzıra-i mezbûre Fatıma Hanım’ın hâl-i sıgārında ve diğer kızı mezbûre Şerife Âişetü’s-sıddîka’nın ale’l-iştirâki’s-seviyy tasarruflarında iken sagīrân-ı mezbûrân es-Seyyid Süleyman Necib ve es-Seyyid Mehmed Salih müte‘âkiben fevt olup ber-vech-i muharrer mutasarrıf oldukları nısf hisse-i şâyi‘a-i menzil-i mezkûr mahlûl ve cânib-i vakf-ı mezkûra âid oldukda kızım hâzıra-i mezbûre Fatıma Hanım sagīre ve mahcûre iken li-ebin karındaşları müteveffiyân-ı sagīrân-ı mezbûrân es-Seyyid Süleyman Necib ve es-Seyyid Mehmed Salih’in mahlûl olan nısf hisse-i şâyi‘a-i merkūmelerini vakf-ı mezkûrun mütevelliyesi olan müvekkile-i mezbûre Fatıma Hanım bin iki yüz elli üç senesi Cumâdelâhiresinin beşinci günü iki bin guruş mu‘accele ile mahcûre-i mezbûreye îcâr ol dahi vasîyy-i hâzır-ı mezbûr Osman <> Efendi’nin [153] Osman Efendi’nin dahi izinsiz istîcâr ve ba‘dehû yine târih-i merkūmda nısf hisse-i şâyi‘a-i merkūme ile babası müteveffâ-yı mezbûrun intikālinden tasarrufunda olan rub‘ hisse-i şâyi‘a-i menzil-i mezkûru dahi meccânen bana ferâğ ve mütevellî[ye]-i mezbûre eski ve atik temessüğü hâmişine ber-vech-i muharrer kendinin îcârını ve kızı mezbûrenin ferâğını tahrîr ve temhîr etmiş ise de şehr-i mezkûrun on yedinci günü Evkāf-ı Hümâyûn nâzırı ve vakf-ı mezkûrun kāimmakām-ı mütevellîsi bulunan hâlâ Anadolu Defterdârı ecille-i ricâl-i Devlet-i aliyyeden sa‘âdetlü Ahmed Sadık Ziver Efendi mezûn olmalarıyla ber-vech-i muharrer mütevelliye-i mezbûrenin îcârını ve kızım mezbûrenin istîcârını tutmayıp müteveffiyân-ı sagīrân-ı mezbûrân es-Seyyid Süleyman Necib ve es-Seyyid Mehmed Salih’in mahlûl olan nısf hisse-i şâyi‘a-i merkūmelerini icâre-i mu‘accele-i misli olan bin dokuz yüz guruş mu‘accele-i makbûza ve müeccele-i mümâsili olan şehriye otuz akçe icâre-i müeccele ile vâlideleri mezbûre Şerife Emine Hatun’a îcâr ve tefvîz ve târih-i merkūm ile müverrah yedine bir kıt‘a temessük dahi i‘tâ etmeleriyle mezbûre Şerife Emine Hatun nısf hisse-i şâyi‘a-i menzil-i mezkûra vaz‘-ı yed eder lâkin kızım hâzıra-i mezbûre Fatıma mücerred ve mezbûre Şerife Emine Hanım’dan mukaddem nısf hisse-i şâyi‘a-i merkūmeyi ber-vech-i muharrer istîcâr ve ba‘dehû bana fâriğa olup mütevelliyesi müvekkile-i mezbûre dahi temessük-i mezkûr hâmişini tahrîr ve temhîr etmekle öyle olucak nısf hisse-i şâyi‘a-i menzil-i mezkûrdan keff-i yed edip bana teslîm etmek üzere merkūme Şerife Emine Hatun’a cebr olunmak murâdımdır deyü kızı hâzıra-i mezbûrenin dahi tasdîkiyle tasaddî eylediği da‘vâsı takrîr-i meşrûhu üzere şer‘an ve kānûnen mesmû‘a ve iltifâta şâyân olmadığı müdde‘iye-i mezbûre Nazende Kadın’a tefhîm ve mûcebince da‘vâ-yı mezkûresiyle mezbûre Şerife Emine Hatun’a bî-vech mu‘ârazadan ba‘de’l-men‘ nısf hisse-i şâyi‘a-i mezkûreyi merkūme Şerife Emine Hatun’un kemâ-kân zabt ü tasarrufu iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 13 Receb sene 1258