İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 457 Hüküm no: 395 Orijinal metin no: [153-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık’ın Yusuf Bey’den satın aldığı cariyenin kusurlu olduğundan cariyenin geri alınıp parasının ödenmesi talebiyle açtığı davada haksız bulunduğu Câriye men‘i [Ma‘rûz] İstanbul’da vâki‘ Batpazarı Kethudâsı sâhib-i arzuhâl es-Seyyid Mehmed Sadık Ağa b. Mehmed b. Abdullah tarafından husûs-ı âti’l-beyânda vekîl olduğu Koltukçu Hüseyin Ağa b. Yusuf ve Mehmed Said Ağa b. Yusuf nâm kimesneler şehâdetleriyle ber-nehc-i şer‘î sâbit olan Ahmed Ağa b. Osman meclis-i şer‘-i münîrde Enderûn-ı hümâyûn’dan muhrec derûn-ı arzuhâlde mezkûrü’l-ism Yusuf Bey b. Ali muvâcehesinde müvekkilim mezbûr es-Seyyid Mehmed Sadık Ağa’nın şehr-i sâbık Cumâdelâhiresinin on beşinci günü cemî‘ uyûbdan sâlime olmak üzere yedi yüz elli guruş semen-i medfû‘ ve makbûza mezbûr Yusuf Bey’den iştirâ ve kabz eylediği işbu hâzıratü bi’l-meclis on bir yaşında olan bir re’s zenciye câriye-i sagīre selîsü’l-bevl illetiyle mu‘ayyebe ve ayb-ı merkūm şirâ târihinden kadîm ve inde’t-tüccâr noksân-ı semen îcâb eder uyûbdan olmağla redd-i mebî‘ ve istirdâd-ı semen murâdımdır deyü teveccüh-i husûmet bulundukdan sonra bi’l-vekâle da‘vâ ettikde mezbûr Yusuf Bey dahi cevâbında câriye-i mezkûreyi müvekkil-i mezbûr es-Seyyid Mehmed Sadık Ağa’ya ber-vech-i muharrer bey‘ini ve semen-i mezkûru kabzını ikrâr ve ayb-ı mezkûrun kıdemini inkâr eylediğinden mâ‘adâ müvekkil-i mezbûr es-Seyyid Mehmed Sadık Ağa’ya câriye-i mezbûreyi ayb-ı merkūmuna muttali‘ oldukdan sonra işbu târih-i i‘lâmdan on beş gün mukaddem Esirpazarı’nda bey‘e arz etmiş idi deyü inkâra mukārin eylediği def‘ini esirci <> tâifesinden Eyüblü Mustafa Ağa b. Mehmed Emin ve es-Seyyid Ahmed Ağa b. es-Seyyid Mustafa ve İbrahim Edhem Ağa b. el-Hâc Hasan nâm kimesneler şehâdetleriyle bi’l-muvâcehe vech-i vecîh-i şer‘î üzere isbât ettikde müdde‘î-i vekîl-i mezbûr Ahmed Ağa şühûd-ı mezbûrûnun âdiller idikleri [ve] şehâdetlerinden Sadıklar olduklarını bi’l-vekâle ikrâr ve tasdîk etmeğin mûcebince müdde‘î-i vekîl-i mezbûr Ahmed Ağa da‘vâ-yı mezkûresiyle mezbûr Yusuf Bey’e bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 23 [Re]ceb sene 1258