İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 458 Hüküm no: 396 Orijinal metin no: [153-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kozoğlu Kiryako’nun vakıf bakkāl dükkânına ilave ettiği odanın yıkılması Bakkāl dükkânı nizâ‘ına dâir [Ma‘rûz] İstanbul hısnı ebvâbından Bâb-ı Câferî dâhil ve hâricinde ve civârında vâki‘ tarîk-i âmma üzerlerinde kâin dekâkin mutasarrıflarından ashâb-ı arzuhâl Kuruyemişciler Kethudâsı el-Hâc Ahmed Ağa ve Yiğitbaşısı Hüseyin Ağa ve esnâfından Keskinoğlu Mehmed Ağa ve Yeşildirekli Ahmed Efendi ve es-Seyyid Mehmed Hoca ve Hamza Yazıcı ve Hüseyin Ağa ve Tuzcu esnâfından Mehmed Ağa ve es-Seyyid İbrahim Ağa ve Abdülaziz Ağa ve tütüncü esnâfı nizâm ustalarından el-Hâc Hüseyin Ağa ve el-Hâc Ömer Ağa ve Yumurtacılar Kethudâsı Ömer Ağa ve esnâfından Hasan Ağa ve el-Hâc İsmail Efendi ve Zeytyağcılar Kethudâsı es-Seyyid el-Hâc Emrullah Ağa ve esnâfından el-Hâc Ali Ağa ve Balmumcular Kethudâsı Ahmed Ağa ve Yiğitbaşı Mehmed Ağa <> ve esnâfından el-Hâc İsmail Efendi ve Zahîreciler Kethudâsı Hafız İbrahim Efendi ve esnâfından el-Hâc Mehmed Ağa ve el-Hâc Ömer Ağa ve Tekneciler Kethudâsı Mehmed Tâhir Ağa ve Yiğitbaşısı Mustafa Efendi ve esnâfından Mehmed Ârif Ağa ve İpciler Kethudâsı es-Seyyid Zeynelabidin Ağa ve esnâfından diğer es-Seyyid Zeynelabidin Ağa ve Mehmed Sadık Ağa ve es-Seyyid Mustafa Ağa ve Tahtabıçkıcılar Kethudâsı el-Hâc Hafız Mehmed Ağa ve esnâfından el-Hâc Hafız Mustafa Ağa ve sâir mazbûtü’l-esâmî kimesneler bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde bâb-ı mezkûrdan hurûc olundukda Çardak İskelesi’ne giden tarîkin cânib-i yemîninde vâki‘ bakkāl dükkânından ta‘dâd ile çardak karşısında köşede kâin bir tarafdan Bakkāl Emin Ağa ve bir tarafdan Tuzcu Hüseyin Ağa dükkânları ve tarafeynden tarîk-i âm ile mahdûd bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan İstanbul’da vâki‘ Ayasofya-i kebîr Câmi‘-i şerîfi Vakfı müsakkafâtından cibâyet-i müşâhere-i kenâr-ı deryâya tâbi‘ âyineli dükkân demekle arîf üçüncü bir bâb vakıf bakkāl dükkânı derûnunda mevcûde beyne’l-esnâf gedik ta‘bîr olunur Evkāf-ı Haremeyn-i Muhteremeyn müstegallâtından âlât-ı lâzıme-i ma‘lûmenin yüz yirmi sehm i‘tibârıyla altmış sehm hisse-i şâyi‘asına bâ-temessük-i mütevellî bi’l-icâreteyn mutasarrıf olan derûn-ı arzuhâlde ismi mastûr Kozoğlu Kiryako v. Nikola nâm zimmî muvâcehesinde Evkāf-ı Haremeyn-i Muhteremeyn kāimmakām-ı mütevellîsi ecille-i ricâl-i Devlet-i aliyyeden hâlâ Evkāf-ı Hümâyûn Nâzırı sa‘âdetlü Mustafa Kânî Beyefendi taraflarından mürsel vekîlleri cibâyet-i merkūme câbîsi es-Seyyid el-Hâc Mehmed Mehdi Efendi b. es-Seyyid Ahmed hâzır olduğu hâlde mersûm Kiryako zimmî ber-vech-i muharrer gediğin altmış sehm hisse-i şâyi‘asına mutasarrıf olduğu beş buçuk zirâ‘ kaddinde olan dükkân-ı mezkûr fevkınde kâin üç zirâ‘ altı parmak kaddinde olan bir bâb kadîm odaya adem-i kanâ‘atla fevkine üç zirâ‘ kaddinde mugāyir-i nizâm ve hilâf-ı emr-i âlî bir bâb oda dahi kendi mâlından harc u sarfla bilâ-izni’l-müteveffâ [mütevellî] binâ ve ihdâsa şurû‘ birle <> direklerini vaz‘ edip ancak esvâk-ı mezkûrede ma‘a fevkānî oda sekiz zirâ‘ on sekiz parmak kaddinden ziyâde ebniye olmayıp ve mersûm Kiryako zimmînin ber-vech-i muharrer ihdâs eyleyeceği oda-i [154] mezkûr mugāyir-i nizâm ve hilâf-ı emr-i âlî olduğundan mâ‘adâ oda-i mezkûrda mersûm Kiryako zimmî ve avenesi geceleri beytûtet edeceğinden bi’z-zarûre îkād edecekleri ateş ma‘âzallahi te‘âlâ mûcib-i ihrâk olunur bir keyfiyet olup ve esvâk-ı mezkûre üzerlerinde kâin dekâkin derûnlarında geceleri beytûtet olunarak ateş îkādı dahi ez kadîm memnû‘ olmağla sâlifü’l-beyân ihdâs eylediği üç zirâ‘ kaddinde olan fevkānî bir bâb oda hedm ve kal‘ olunmak murâdımızdır deyü kāimmakām-ı mütevellî vekîli hâzır-ı merkūm tasdîkiyle istid‘â ettiklerinde mersûm Kiryako zimmî dahi cevâbında ber-vech-i meşrûh ikrâr u i‘tirâf edip lâkin esvâk-ı mezkûre üzerlerinde kâin ba‘zı dekâkinde dahi minvâl-i meşrûh üzere muhdes odalar olmağla ben dahi binâ ihdâs eylediğim sûretde kimesneye zararı olmaz dedikde istikşâf-ı hâl için taraf-ı dâ‘îlerinden irsâl olunan Kâtib es-Seyyid Mustafa Abdüllatif Efendi ve müfettiş-i mûmâ-ileyh tarafından mürsel Kâtib es-Seyyid Mehmed Efendi ebniye-i hâssa müdîri efendi bendeleri hulefâsından Ahmed Şevki ve es-Seyyid Hafız Ali halîfeler ile dükkân-ı mezkûr üzerine varıp tarafeyn ve mütevellî vekîli hâzır oldukları hâlde bi’l-ma‘iyye keşf ve mu‘âyene ettiklerinde dükkân-ı mezkûr bu def‘a ihdâs olunan oda ile mâ‘an on bir zirâ‘ on sekiz parmak kaddinde olup ve dükkân-ı mezkûrun bulunduğu tarîk-i âmm-ı mezkûr üzerinde olan ebniyeler mu‘âyene olundukda fi’l-hakīka zikr olunduğu üzere sekiz zirâ‘ on sekiz parmak kaddinde olduğunu mahâllinde ketb ü tahrîr ve mâ‘an meb‘ûs ümenâ-i şer‘le <> Çarşamba günü huzûr-ı hazret-i Fetvâ-penâhî’de müfettiş-i mûmâ-ileyh tarafından meb‘ûs mûmâ-ileyh Mehmed İzzet Efendi ile akd olunan meclis-i şer‘-i hatîre gelip tarafeyn muvâcehelerinde halîfân-ı merkūmân hâzır <> oldukları hâlde alâ-vukū‘ihî inhâ ve takrîr ve halîfetân-ı mezbûrân dahi husûs-ı mezkûra ihrâc eyledikleri resmi ibrâz ve irâe birle bu makūle bakkāl dükkânları yedi zirâ‘ kaddinde binâ olunup üzerine ebniye ihdâsı bâ-fermân-ı âlî memnû‘ idiğini ihbâr ve tarafeyn dahi tasdîk etmeğin bu sûretde mersûm Kiryako zimmînin dükkân-ı mezkûr üzerine bu def‘a binâ ve ihdâs eylediği üç zirâ‘ kaddinde olan odanın ebniye-i hâssa müdîri efendi ma‘rifetiyle hedm ve kal‘ ı iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 24 R Receb sene 1258