İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 461 Hüküm no: 398 Orijinal metin no: [154-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kristosodor zimmînin ölen Kirkor zimmîye ait kıymetli eşya ve paralara el koyduğu iddiasıyla vârislerinin açtıkları davayı ispatlayamadıkları 5000 [guru]şa men‘ [Ma‘rûz] Mısr-ı Kāhire’de mütemekkin iken sene-i sâbıkā hilâlinde hâlik olan Kirkor nâm zimmînin verâseti Âsitâne-i aliyye’de mütemekkinler anası Takohi bt. Tolfi v. Atam Nasrâniye ile babası Kürkçü Artin v. Agop v. Atam zimmîye ba‘de’l-inhisâr vârisân-ı mersûmân Artin zimmî ve Takohi Nasrâniyenin kebîr oğulları ve taraflarından husûs-ı âti’l-beyânda vekîlleri olduğu şahs-ı mersûmeyi bilirler Fihrad v. Mıgırdıç ve Serkiz v. Haçador nâm zimmîler şehâdetleriyle sâbit olup arzuhâl eden Mıgırdıç zimmî bi’d-defa‘ât Çarşamba günleri huzûr-ı hazret-i Fetvâ-penâhî’de ma‘kūd meclis-i şer‘-i hatîrde mukaddemâ kuyumcu esnâfından derûn-ı arzuhâlde ismi mastûr Kristosodor v. Sahak zimmî muvâcehesinde karındaşım hâlik-i mersûm Kirkor zimmînin müvekkillerim babam ve anam mersûmân Artin zimmî ve Takohi Nasrâniyeye mevrûs terekesinden bin guruş kıymetli kırk zirâ‘ barutî çukası ile beş bin beş yüz guruş nakdi bi-tarîki’l-emâne mersûm Kristosodor zimmî yedinde olmağla cümlesini mersûm Kristosodor zimmîden bi’l-vekâle hâlâ taleb ederim deyü ba‘de’d-da‘vâ ve’l-inkâr müdde‘î-i vekîl-i mersûm Mıgırdıç zimmî ber-vech-i muharrer müdde‘âsını lede’l-istimhâl ve’l-imhâl kirâren ve mirâren müddet-i şer‘î mürûrunda şâhidim yokdur deyü isbâtdan izhâr-ı acz edip talebiyle mersûme Kristosodor zimmîye bi’l-muvâcehe ber-nehc-i şer‘î yemîn verilmeğin mûcebince müdde‘î-i vekîl-i mesfûr Mıgırdıç zimmî da‘vâ-yı mezkûresiyle mersûm Kristosodor zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 24 [Re]ceb sene 1258