İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 461 Hüküm no: 399 Orijinal metin no: [154-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Abdurrauf Efendi’nin Haçador v. Avanis’e olan borcunu ödemesi Han nizâ‘ında 12450 [guru]şa sulh [Ma‘rûz] Dülger kalfalarından arzuhâl sâhibi Haçador v. Avanis zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî [155] izzetlü fazîletlü es-Seyyid Mehmed Emin Âsaf Beyefendi tarafından mürsel Kâtib Hüseyin Hamdi Efendi hâzır olduğu hâlde meclis-i şer‘-i münîrde müderrisîn-i kirâmdan derûn-ı arzuhâlde mezkûrü’l-ism el-Hâc Mehmed Abdurrauf Efendi b. el-merhûm bâ-pâye-i İstanbul Medîne-i Münevvere kādısı esbak Pirlepevî el-Hâc Hafız Ahmed Efendi muvâcehesinde bundan mukaddem mûmâ-ileyh el-Hâc Mehmed Abdurrauf Efendi bana İstanbul’da Ebu’l-feth Sultan Mehmed Han -aleyhi’r-rahmetü ve’l-gufrân- Câmi‘-i şerîfi civârında Büyükkaraman nâm mahâlde olup bi’l-icâreteyn taht-ı tasarrufumda olan arsa üzerine kendi mâlından iktizâ eden kereste ve levâzım-ı sâirenle iki kat olarak fevkānî ve tahtânî elli bâb sagīr ve kebîr oda ve bir bâb berber dükkânı ve müştemilât-ı ma‘lûmeyi hâvî benim için bir bâb han binâ ve inşâ eyle beher zirâ‘ına sana yetmiş guruş vereyim demekle ben dahi râzı olup arsa-i mezkûre üzerine kendi mâlımdan iktizâ eden kereste ve levâzımât-ı sâiremle ber-minvâl-i muharrer mûmâ-ileyh için bir bâb han binâ ve inşâ ve tekmîl ile kendine teslîm etmemle hâlâ ebniye-i hâssa müdîri efendinin bir kıt‘a defteri nâtık olduğu üzere hân-ı mezkûrun binâsında mâlımdan yetmiş bir bin dört yüz altmış beş buçuk guruş masrûfum olup meblağ-ı merkūmun mukaddemâ elli iki bin iki yüz otuz beş guruşunu bana edâ etmiş olmağla bâkīsi olan on dokuz bin iki yüz otuz buçuk guruşu dahi mûmâ-ileyh el-Hâc Mehmed Abdurrauf Efendi’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn mûmâ-ileyh [ile] kat‘an-li’n-nizâ‘ on iki bin dört yüz seksen altı buçuk guruş on para üzerine bi’t-terâzî ba‘de-akdi’l-musâlaha ve’l-kabûl mûmâ-ileyh el-Hâc Mehmed Abdurrauf Efendi bedel-i sulh-ı mezkûr on iki bin dört yüz seksen altı buçuk guruş on parayı bana edâ ve teslîme ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 27 Receb sene 1258