İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 462 Hüküm no: 400 Orijinal metin no: [155-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu Nikoli’nin dükkân gediğini başka yere nakline izin verilmediği Turşucu gediği[nin] Tatavla’ya nakli bâ-fermân-ı âlî memnû‘ Mübârek ve mes‘ûd rikâb-ı kamer-tâb-ı merâhim-nisâb-ı şâhâneye arzuhâl takdîm eden turşucu esnâfından Nikoli v. Yamandi zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde esnâf-ı mezkûreden derûn-ı arzuhâlde ismi mezkûr Hasan Ağa b. el-Hâc Mehmed muvâcehesinde esnâf-ı mezkûre Kethudâsı el-Hâc Hafız Mehmed Ağa ve esnâf-ı mezkûreden el-Hâc Mehmed Ağa ve Mustafa Ağa ve Süleyman Ağa ve Hasan Ağa ve Abdullah Ağa ve Halil Ağa ve Mehmed Ağa ve Ebûbekir Ağa ve el-Hâc Ali Ağa ve Yiğitbaşı el-Hâc Süleyman ve sâir mazbûtü’l-esâmî kimesneler hâzır oldukları hâlde asâkir-i hâssa-i cenâb-ı cinân-bânî [cihân-bânî] müşîr-i me‘âlî-semîr devletlü Hasan Rıza Paşa hazretlerinin li-vechi sübhânihi ve te‘âlâ binâsına muvaffak oldukları mahrûse-i Galata’ya muzâfe kasaba-i Kasımpaşa’ya tâbi‘ Tavla [Tatavla] karyesi kurbünde Pelitcik Deresi demekle meşhûr mahâlde vâki‘ çeşme-i mâ-i lezîz vakf-ı şerîfleri müstegallâtından çeşme-i mezkûr civârında kâin ma‘lûmü’l-hudûd bir bâb turşucu dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme vakf-ı şerîf-i mezkûrun bi’l-meşrûta mütevellîleri vâkıf-ı müşîr-i müşârün-ileyh hazretlerinin yedime i‘tâ eyledikleri işbu bir kıt‘a temessük mûcebince bi’l-icâreteyn hâlâ taht-ı tasarrufumda olup kadîmü’l-eyyâmdan bu âna gelince turşucu dükkânı olduğu mahâlden âhar mahalle gedik nakl olunmamak esnâf-ı merkūmenin bâ-fermân-ı âlî nizâm-yâfte olan şurût-ı mer‘iyelerinden iken mezbûr Hasan Ağa bu esnâda mugāyir-i nizâm kasaba-i mezkûrede Uzunyol’da Arab odaları karşısında kâin bir bâb turşucu dükkânı derûnunda mevcûde beyne’l-esnâf gedik ta‘bîr olunur taht-ı tasarrufunda olan âlât-ı lâzıme-i ma‘lûmeyi ber-vech-i muharrer gediğine mutasarrıf olduğum dükkân-ı mezkûr civârında tedârik eylediği dükkâna nakletmek murâd etmekle men‘ olunmak murâdımdır deyü istid‘â ve esnâf-ı hâzırûn-ı mezbûrûn dahi müdde‘î-i mersûm Nikoli zimmîyi tasdîk ve onlar dahi ber-vech-i muharrer nizâm-ı kadîmlerinin inhilâl-pezîr olmaması bâbında istid‘â-yı inâyet ve nizâm-ı mezkûrlarını nâtık bir kıt‘a fermân-ı âlî-şân ibrâz ettiklerinden mezbûr Hasan Ağa dahi emr-i celîlü’ş-şân-ı mezkûrun mazmûnunu ve mugāyir-i emr-i âlî ve nizâm ber-vech-i muharrer nakl-i gedik murâd eylediğini ikrâr ve fî-mâ ba‘d hilâf-ı emr-i âlî ve nizâm-ı kadîm hareket etmeyip bu misillü nakl-i gedik sevdâsıyla kimesneyi ta‘cîz ve tasdî‘ etmemeğe ta‘ahhüd ettiği İstanbul Mahkemesi’nden huzûr-ı [âlîlerine i‘lâm olundu] Fî 24 [Re]ceb sene 1258