İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 463 Hüküm no: 401 Orijinal metin no: [155-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirhor’a borcunu ödemediğinden hapiste bulunan Zafiri’nin müflis ve fakir olduğunu beyan ederek serbest bırakılması talebini ispat edemediğinden mahkûmiyetinin devamına karar verildiği İflâs hükmü [Ma‘rûz] Hâmiş-i arzuhâlde mastûr derkenâr nâtık olduğu üzere derûn-ı arzuhâlde ismi mastûr Kuyumcu Kirhor v. Agop nâm zimmîye ber-vech-i âtî mahkûmün-bih deyni için işbu sene-i mübâreke şehr-i Rebî‘ülâhirinin on yedinci gününden berü Bâb-ı Seraskerî’de Tomruk mahbesinde mahbûs olan arzuhâl sâhibi kuyumcu arayıcısı Zafiri v. Yakof zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde mersûm Kirhor zimmî muvâcehesinde ben işbu mesfûr Kirhor zimmîye bâ-i‘lâm-ı şer‘î mahkûmün-bih altı bin guruş deynimin tahsîli’çün târih-i merkūmdan berü mahbûs olup lâkin el-yevm lâbis olduğum köhne libâsımdan gayrı ismi mâl ıtlâk olunur nesnem olmayıp mu‘dim ve mu‘sir ve müflis olmamla bir vecihle deyn-i mezkûrumu edâya kudretim yokdur deyü isârını da‘vâ ve hapisden ıtlâkını istid‘â ve dâyini mersûm Kirhor zimmî dahi medyûn-ı mersûmun ber-vech-i muharrer mahbûs olduğunu ikrâr lâkin müflis olduğunu inkâr birle yesârını da‘vâ edip ve yesâr beyyinesi şer‘an evlâ olmağla dâyini mersûm mahbûs-ı mesfûrun edâ-i deyne iktidârı ve yesâriyeti olduğunu hâline vukūf-ı tamları olup lede’t-tezkiye makbûlü’ş-şehâde idikleri ihbâr olunan zikr olunan kuyumcu esnâfından olup İstanbul’da Samatya kapısı dâhilinde Mirâhor mahallesi mütemekkinlerinden Yorgi v. İstavri ve Kumkapı dâhilinde İncirdibi nâm mahal mütemekkinlerinden Serope v. Temyos nâm zimmîler şehâdetleriyle huzûr-ı hazret-i müşârün-ileyhde bi’l-muvâcehe vech-i şer‘î üzere isbât etmeğin mûcebiyle mersûm Zafiri zimmînin yesârına ba‘de’l-hükm edâ-i deyn edinceye değin hapisde ibkā olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 24 Receb [sene 1258]