İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 464 Hüküm no: 402 Orijinal metin no: [156-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Abraham’ın ortaklıklarını feshettikleri İlya’da kalan alacağının ödenmesi 286 [guru]ş ahz u kabz Bakkāl esnâfından olup arzuhâl eden Abraham v. Kostandi zimmî meclis-i şer‘-i hatîrde mukaddemâ şerîki derûn-ı arzuhâlde ismi mastûr İlya v. Abraham zimmî muvâcehesinde ben mersûm İlya zimmî ile sene-i sâbıkā şehr-i Rebî‘ülevveli gurresinden sene-i merkūme Şa‘bâni’l-mu‘azzamının on beşinci gününe gelince beş buçuk ay müddet bakkāllık ticâretinde inânen şerîkler olup ben târih-i merkūmda fesh-i akd-i şirket edip hâlâ hesâbını sehv ü galatdan ârî yegâh yegân hesâb-ı sahîh ve nizâm ustaları ma‘rifetleriyle rü’yet eylediğimizde lede’l-muhâsebe benim gerek re’s-i mâl ve gerek fâideden hissem olup mersûm İlya zimmî zimmetinde kabzımâl olduğundan iki yüz seksen altı guruş alacağım zuhûr ve ikrâr-ı kat‘î ile ikrâr ve meblağ-ı merkūm iki yüz seksen altı guruşu bana edâ ve teslîme ta‘ahhüd etmekle meblağ-ı mezkûrdan mâ‘adâ bi’l-cümle husûs-ı mezkûra ve zımnında cereyân eden ahz ü i‘tâya ve sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî-gurreti Ş sene 1258