İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 465 Hüküm no: 403 Orijinal metin no: [156-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Vanlı Avadis’e olan borcunu ödemesi 5000 [guru]ş hüküm [Ma‘rûz] Umûr-ı Hâriciye nâzırı iken bundan akdem irtihâl-i dâr-ı bekā eden es-Seyyid Mehmed Seyda Efendi’nin li-ebeveyn hemşîreleri Şerife Âişe Hanım bt. Hasan Efendi’nin Bâb-ı âlîlerine takdîm eylediği arzuhâline sâdır olan fermân-ı âlîlerine imtisâlen arzuhâl-i mezkûr derûnunda ismi mastûr Vanlı Avadis v. İstefan zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde mûmâ-ileyhâ Şerife Âişe Hanım tarafından husûs-ı âti’l-beyânda vekîl-i sâbitü’l-vekâlesi Hafız Abdurrahman Efendi b. el-Hâc Mustafa muvâcehesinde vekîl-i mezbûr Hafız Abdurrahman Efendi’nin yedinde olan bir kıt‘a i‘lâm-ı şer‘î nâtık olduğu üzere müvekkil-i mûmâ-ileyhâ Şerife Âişe Hanım zimmetinde cihet-i karzdan beş bin guruş alacak hakkım olmağla hâlâ taleb ederim deyü ba‘de’d-da‘vâ ve’l-ikrâr mûcebince meblağ-ı mezkûr beş bin guruşun müdde‘î-i mesfûr Avadis zimmîye edâsıyla müvekkile-i mûmâ-ileyhâ Şerife Âişe Hanım’a izâfetle vekîl-i mezbûr Hafız Abdurrahman Efendi ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 10 [Re]ceb sene 1258