İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 465 Hüküm no: 404 Orijinal metin no: [156-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’ya borcu olan Vanlı Avadis’in borcunu ödemesi için yapılan tenbih 17000 [guru]ş hüküm [Ma‘rûz] Teba‘adan sâhib-i arzuhâl es-Seyyid Mustafa Ağa b. Hüseyin tarafından husûs-ı âti’l-beyânda vekîl-i müseccel-i şer‘îsi Sahhâf el-Hâc İsmail Efendi b. Hüseyin Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mastûrü’l-ism Vanlı Avadis v. İstefan zimmî muvâcehesinde mersûm Avadis zimmî bin iki yüz elli beş senesi Cemâziyelevvel’inin yirmi dokuzuncu günü umûr-ı hâriciye nâzırı iken mukaddemâ irtihâl-i dâr-ı bekā eden es-Seyyid Mehmed Seyda Efendi’nin li-ebeveyn hemşîreleri Şerife Âişe Hanım ve mûmâ-ileyhânın kerîmesinin sagīre kızı olup vasîsi olduğum Şerife Hatice Hanım’ın bâ-temessük-i mütevellî bi’l-icâreteyn mutasarrıf oldukları bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Rüstempaşa Vakfı müsakkafâtından İstanbul’da Mahmudpaşa Câmi‘-i şerîfi avlusu nerdubânı nezdinde kâin kârgîr Yarım Han demekle arîf bir bâb vakıf hanın hancılığı ve bir bâb odasının şehriye beşer guruş kirâ ile odacılığı ve zikr olunan odanın gediği Evkāf-ı Hümâyûn tarafından verilen bir kıt‘a temessük ile tasarrufumdadır diyerek on yedi bin guruş bedel mukābelesinde müvekkilim mezbûr es-Seyyid Mustafa Ağa’ya ferâğ ol dahi ber-vech-i muharrer tefevvüz ve bedel-i merkūm on yedi bin guruşu mâlından zimmî-i mersûma def‘ ü teslîm ol dahi yedinden ahz u kabz ettikden sonra asıl ve vasîyy-i mûmâ-ileyhâ Şerife Âişe Hanım ber-vech-i muharrer hancılık ve odacılık ve gedik için izni olmayarak Evkāf-ı Hümâyûn tarafından temessük verildiğine ve müvekkilim mezbûrun dahi hancılık ve odacılığına ve bu vechile gediğe râzıye olmadığından şehr-i sâbık Recebi’l-müreccebinin onuncu günü müvekkil-i mezbûre zikr olunan hancılık ve odacılık ve gedikden bâ-i‘lâm-ı şer‘î keff-i yed ettirilip ve verilen temessük-i mezkûr dahi geriye ahz ve kaydı terkīn olunmağla mersûm Avadis zimmînin ber-vech-i muharrer bedel-i ferâğ nâmıyla müvekkilim mezbûr es-Seyyid Mustafa Ağa’dan makbûzu olan meblağ-ı mezkûr on yedi bin guruşu zimmî-i mersûmdan bi’l-vekâle hâlâ istirdâd ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı mezkûr on yedi bin guruşu müdde‘î-i vekîl-i mezbûr el-Hâc İsmail Efendi’ye redd ü teslîme mesfûr Avadis zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 2 Ş sene 1258