İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 466 Hüküm no: 405 Orijinal metin no: [156-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlı Tacir Ali Penah’ın Karslıoğlu Markiro’ya açtığı alacak davasında haksız bulunduğu 16000 [guru]ş men‘ [Ma‘rûz] Diyâr-ı İran’da Hoy şehri Kazâsı’nda Salahyan karyesinde sâkin tüccârdan Hacı Ali Penah b. Hacı Mehmed b. Abdullah tarafından husûs-ı âti’l-beyânda vekîl olduğu Molla Abdullah b. Hacı Ali ve Hüdaverdi b. Ali nâm kimesneler şehâdetleriyle ber-nehc-i şer‘î sâbit olan derûn-ı takrîrde mezkûrü’l-ism İranlı el-Hâc İsmail Ağa b. Mehmed Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde vilâyet-i Anadolu’da medîne-i Van re‘âyâsından kezâlik derûn-ı takrîrde mastûrü’l-ism Karslıoğlu Markiro v. Talos zimmî muvâcehesinde müvekkilim gāib-i mezbûr Hacı Ali Penah medîne-i mezkûrede li-ecli’t-ticâre sâkin iken bin iki yüz elli iki senesi duhûl eden Kânûn-ı-sâni’nin on ikinci günü İstanbul’da mütemekkin li-ebeveyn er karındaşı gāib ani’l-meclis Hıristafiz zimmîden bi-tarîki’l-poliçe kabz etmek için <> medîne-i mezkûrede mesfûr Merkiro zimmîye mâlından medîne-i mezkûrede sâkin li-ebeveyn er karındaşı Hacı Cafer yediyle on sekiz bin guruş ikrâz ve teslîm ol dahi iktirâz ve kabz ve istihlâk ve meblağ-ı merkūm cihet-i mezkûreden zimmetinde müvekkilim gāib-i mezbûra deyni olduğunu ikrâr ettikden sonra ber-vech-i meşrûh ikrârını müştemil târih-i merkūm ile müverrah müvekkilim mezbûr yedine verdiği Ermeniyyü’l-imlâ işbu bir kıt‘a poliçe temessüğü müvekkilim mezbûr bana irsâl ve meblağ-ı merkūmu mersûm Hıristafiz zimmîden kabza tarafından beni tevkîl ettikde ben dahi ba‘de’l-kabûl mersûm Hıristafiz zimmîden poliçe temessüğünü irâe birle meblağ-ı merkūmu bi’l-vekâle mutâlebe eylediğimde ol dahi meblağ-ı merkūmu vereyim deyip ancak iki bin guruşunu bana vermekle bâkīsi olup mersûm Markiro zimmî zimmetinde kalan on altı bin guruşu dahi zimmî-i mersûmdan bi’l-vekâle hâlâ taleb ederim deyü [157] da‘vâ ettikde ol dahi cevâbında müvekkil-i gāib-i mezbûr Hacı Ali Penah’a bâkī deynim olan meblağ-ı mezkûr on altı bin guruşu dahi bin iki yüz elli üç senesi duhûl eden Temmuz’un yirmi üçüncü günü mârrü’z-zikr medîne-i Van’da Pamukcularbaşı’nda vâki‘ dükkânımda müvekkil-i gāib-i mezbûr Hacı Ali Penah b. Hacı Mehmed b. Abdullah’a tamamen edâ ve teslîm etmiş idim deyü inkâra mukārin eylediği def‘ini medîne-i mezkûre ahâlisinden İstanbul’da Ebu’l-feth Sultan Mehmed Han Câmi‘-i şerîfi civârında Mezbele Hanı’nda sâkin Hacı Ahmed torunu Rençber Ali b. Mehmed ve Tahtakale civârında Kādîhan’da sâkin Bozanmakoğlu? Rençber İbrahim b. Ebûbekir nâm kimesneler şehâdetleriyle huzûr-ı hazret-i müşârün-ileyhde bi’l-muvâcehe vech-i vecîh-i şer‘î üzere isbât edip müdde‘î-i vekîl-i mezbûr el-Hâc İsmail Ağa bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i enverde mersûm Merkiro zimmî muvâcehesinde şâhidân-ı mezbûrânın âdiller ve eyledikleri şehâdetlerinde sâdıklar olduklarını bi’l-vekâle ikrâr ve tasdîk etmeğin mûcebince müdde‘î-i mezbûr el-Hâc İsmail Ağa da‘vâ-yı mezkûresiyle mesfûr Merkiro zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 3 Receb sene 1258