İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 467 Hüküm no: 406 Orijinal metin no: [157-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taris bt. Tarandafil’in ölümüne sebep olan kocası Dimitri’nin belirlenen diyet bedelini ödemesi Diyet-i inâs hüküm Ma‘rûz Evkāf-ı Hümâyûn tarafından idâre olunan Suyolu kurâsından Burgos karyesinde mütemekkine iken ber-vech-i âtî mecrûhaten hâlike olan Taris bt. Tarandafil Nasrâniyenin verâseti anası Kason bt. Tanaş Nasrâniye ile zevci Bakkāl Panayot v. Mihal nâm zimmînin firâşından hâsıllar sulbî kebîr oğlu Mihal zimmî ve sagīr oğulları Tanaş ve Tarandafil ve sagīre kızları Eleni ve Anaştaşya’ya münhasıra olduğu şer‘an zâhir ve mütehakkık oldukdan sonra arzuhâl sâhiblerinden mersûm Mihal zimmî hâlike-i mersûmenin anası mesfûre Kason Nasrâniyenin sadrî kebîr oğlu ve tarafından husûs-ı âti’l-beyânda vekîl olduğu şahsını ârifân Ahmed Ağa b. Mehmed nâm kimesne ile Yanako v. Mihal nâm zimmî şehâdetleriyle ber-nehc-i şer‘î sâbit olup sıgār-ı mersûmûna li-ecli’l-maslaha kıbel-i şer‘den vasî nasb olunan Dimitri veledi’l-mersûm Tarandafil zimmî hâzır olduğu hâlde bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde hâlike-i mersûmenin zevci derûn-ı arzuhâlde ismi mastûr mesfûr Panayot zimmî muvâcehesinde şehr-i sâbık Cumâdelâhirenin yirmi altıncı günü babam zevc-i mersûm Panayot zimmî karye-i mezkûrede vâki‘ menzilinden koyun getirmek için âhar mahalle gitmek murâd ve bir tek piştovunu kurşun ile doldurup kurulu olduğunu bilmeyerek karşılığını açıp kapadıkda piştov boşalıp kurşunu zevcesi anam mersûme Taris Nasrâniyenin sağ memesi üzerine isâbet ve arkasından hurûc edip ol anda müte’essireten hâlike olmağla zevci babam mersûm üzerine lâzım gelen diyet-i mer’e beş bin dirhem gümüşden hisse-i mîrâs mutâlebesine ve bi’l-cümle husûs-ı mezkûra müte‘allika âmme-i da‘vâdan ben ve hâlim hâzır-ı vekîl-i mesfûr Dimitri zimmîden her birimiz zevc-i mersûm Panayot zimmînin zimmetini ibrâ-i âmm-ı sahîh-i şer‘î ile ben bi’l-asâle ve hâzır-ı mersûm dahi anası ve müvekkilesi mersûme Kason Nasrâniyeye izâfetle bi’l-vekâle ibrâ ve iskāt eylediğimizde ol dahi ibrâ-i mezkûrumuzu ba‘de’l-kabûl diyet-i mezkûreden benimle büyük anam müvekkile-i mesfûre Kason Nasrâniyenin ber-vech-i muharrer ibrâ eylediğimiz hisse-i mîrâslarımızdan mâ‘adâ bâkī kalıp evlâd-ı sıgār-ı mersûmûnun hisseleri olan cem‘an iki bin yüz yirmi dört buçuk dirhem altı kırat yedi sümün kırat-ı şer‘î gümüş ile üç südüs ve üç rub‘ kırat gümüşü dahi hâlâ lede’d-da‘vâ ve’l-ikrâr ba‘de’l-hükm vech-i şer‘î üzere edâya ta‘ahhüd eyledi dediğini hâzır-ı vekîl-i mersûm Dimitri zimmî ile mersûm Panayot zimmîden her biri tasdîk ve tahkīk eyledikleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 3 B sene [12]58